నా ప్రేయసి

ప్రేమపూలు వర్షించే..మేఘంలా నా ప్రేయసి..!

మదిలోయల గమకాలకు..రాగంలా నా ప్రేయసి..!

అక్షరాల పల్లకిలో..నవవధువై సిగ్గులొలుకు..

తెఱతొలగని పరువాలకు..అందంలా నా ప్రేయసి..!

లాస్యవీణ తంత్రులలో..నాట్యమాడు కోమలియే..

కడలియలల నురగలింటి..హాసంలా నా ప్రేయసి..!

పరుగుతీయు సెలయేటికి..సొగసులెన్ని ఇచ్చేనో..

పరవశించి ప్రవహించే..గీతంలా నా ప్రేయసి..!

తాపాలకు ఊయలైన..తనువదెంత గొప్పగురువు..

తలపులెల్ల పండించే..గగనంలా నా ప్రేయసి..!

స్వప్నచిత్ర సీమనేలు..సరసమౌన వాహినియే..

మాటలకే చోటివ్వని..ప్రాణంలా నా ప్రేయసి..!