మనసున

ఆకర్షణ మంత్రమేదొ..మ్రోగే'నా మనసున..! 

మైమరపులతో'రణమే..మిగిలే'నా మనసున..! 

కిటికీలను మూయలేని..తనమేమో తెలియదు.. 

వస్తావను ఆశ అలా..వెలిగే'నా మనసున..! 

విరహమేమొ అందమైన..గులాబిలా నవ్వెను.. 

నిత్యప్రేమ సురభిళములు..చేరే'నా మనసున..! 

అగ్నివీణ ఈ తనువే..రాగాలకు బానిస.. 

నాట్యమాడు స్వరములేవొ..నిండే'నా మనసున..! 

నాది-నేను అక్షరాల..మౌనసుధగ మారగ.. 

మెఱుపుతేనె వానలోన..కురిసే'నా మనసున..! 

కోటిపూల తేఱు ఎలా..ఉంటుందో ఏమో.. 

భావగగన వీధులనే..ఏలే'నా మనసున..!