మనసుకు భ్రమ నువ్వేనని

ఎవరినీడ ఎదురయినా మనసుకు భ్రమ నువ్వేనని 

ఏ కదలిక కనపడినా మనసుకు భ్రమ నువ్వేనని 

చింత ఎంతొ మదినిండా నీ జాడే తెలియకుండ

ఏ గొంతుక వినపడినా మనసుకు భ్రమ నువ్వేనని 

చెప్పలేను నీ దూరం కష్టమెంతొ నా మనసుకు

ఏది తగిలి తడబడినా మనసుకు భ్రమ నువ్వేనని 

తుడవలేక పోతున్నా ఒలుకుతున్న కన్నీటిని

ఏ రూపం తచ్చాడినా మనసుకు భ్రమ నువ్వేనని 

కలనైనా నిజమునైన నన్నొదిలి పోవనుకుని

ఏ గాలీ స్పర్శించిన మనసుకు భ్రమ నువ్వేనని...