మౌనములో

మౌనములో చేరుటయే..మేలైనది ఇపుడు..!

నీ చూపుల వెన్నెలయే..విందైనది ఇపుడు..!

కోరికలను పరిమార్చే..ఆయుధమే దొరికె.. 

మరి ఏమీ ఆశించని..మనసైనది ఇపుడు..! 

విశ్రాంతిని ప్రసాదించు..మందిరమది ఏదొ.. 

అనుభవాల సాక్షియైన..తనువైనది ఇపుడు..! 

పాఠాలను బోధించే..వారెవరో ఏమొ.. 

చెలిమిమీర ఈ శ్వాసయె..గురువైనది ఇపుడు..! 

నేర్పరితనమేదైనా..సాధనతో దక్కు.. 

నేర్చుకునే ఆసక్తియె..బలమైనది ఇపుడు..! 

ప్రేమగాక ఈ విశ్వము..నడుపు శక్తి ఏది.. 

విచక్షణయె దారిచూపు..వెలుగైనది ఇపుడు..!