మార్గమేది

ఏది నీకు ఎంతిష్టమొ..తెలుసుకునే మార్గమేది..!?

నువు మెచ్చే బహుమతేదొ..ఇచ్చుకునే మార్గమేది..!?

నోరులేని ఏ పూవును..బలి ఇవ్వను మనప్రేమకు..

నీ పాటకు ఊపిరిలా..అల్లుకునే మార్గమేది..!?

మన శ్వాసల పొదరింటిని..వర్ణించే మాటలేవి..

నీ పెదవుల మౌనమింత..ఒంపుకునే మార్గమేది..!?

గాలికెంత తడబాటో..తనహృదినే మీటుకొఱకు..

తన నవ్వుల మెఱుపులిన్ని..పట్టుకునే మార్గమేది..!?

ప్రేమమధువు లూరించే..ఆ సొగసుల వనమేదో..

తన వసంత మాధురులను..నిలుపుకునే మార్గమేది..!?