కవన వీవనలతో సేద తీర్చనా!!

వలపు రేయిలో కలలో.. కన్నులలో

వసంత సమీరం మెల్లిగా మెదిలింది..

***

చైత్రం చిగుళ్లు విప్పార్చిన తొలి వైశాఖ ముహూర్తాన

ఆమని పాట పాడుతూ ప్రేమ దేశపు యువరాణియో

నా మదిలోకి అడుగుపెట్టింది!!

***

అవ్విధావ

అడుగిడిన ఆ చరణాలకు 

ప్రేమ పారాణిని పూసి..

నాకై కలబడిన ఆ కన్నులకు

నీలిమబ్బులతో కాటుకలద్ది..

ఆ దేవికి దిష్టి తగలకుండా 

కృష్ణ తిలకాన్ని బుగ్గన పెట్టి..

పాలపుంతని పాపిట దిద్ది..

నా హృదయ సీమలోకి ఆహ్వానించాను..

***

తానొక ప్రణయ మాధురి..ప్రణవ మంజరి

 ప్రవణ వల్లరి..దేవేరి.. కావేరి... ఝవేరి

 ప్రవగ ప్రవీణ..నిత్యప్రేమ రసధుని

 మహారాణి.. అలివేణి..

***

ఆ ప్రణయ దివి సీమలో..ప్రేమ తరంగిణికి

నిత్యం ప్రేమాభిషేకాలు చేసే ఆ హృదయ దాసుడను నేను!! ఆ దేవతా మూర్తి స్పర్శ చేతన మాత్రమే

ప్రాణ సమీరం అమృతాలు వెదజల్లుతుందని భావించి నమ్మిన మనోజ్ఞానిని నేను!!

***

అట్టి 

ప్రణయాఖాతంలో ప్రతీ నిత్యం నను ఓలలాడించే

ఆ అఖండ సృష్టిని..అరుదైన ముత్యాన్ని..ఎలా సేవించను??

తన కొరకు తుమ్మెద ఝంకారాలను

వింజామరలుగా మలిచి

కవన వీవనలతో సేదతీర్చనా??!

***

తనకు కవితావధానం ..ప్రేమ గానం...మైత్రీ వనం ఇష్టమైనదని తెలుసుకుని.. సాహితీలతల సోయగాలను అంతరాత్మ నుంచి వెలికి తెచ్చి

మోకాళ్ళపై ఉండి అందించనా??

***

ప్రకృతిని పూలవనంగా మార్చి...

సూర్యకాంతిని, వెన్నెలను,పక్షులను,

నదుల వంపులను..మాలలుగా కూర్చి

ఆ సువర్ణ కాంతుల పుత్తడిబొమ్మకు...

నా బాహువులలో బంధించి నిత్య

 పుష్పాభిషేకం చేయనా??

***

హరివిల్లును వంచి.. చందమామని దించి..

సముద్రాన్ని చుట్టి..భూమిని పైకెత్తి..

ఆకాశాన్ని తుంచి.. ప్రపంచాన్ని..పంచ భూతాల్ని నా వశం చేసుకుని తనకు ప్రేమ కానుకగా ఇవ్వనా??

అయినా తనకు నేనుండగా ప్రకృతి ఎందుకు??

***

లేక....

తన నవ్వులో ప్రతీ నిత్యం యవ్వన వసంత సౌరభాన్ని నింపుతూ..

అలసిన ఆ పాదాలకు సున్నితముగా లేపనానువర్తనం చేస్తూ..

సంపూర్ణమైన ఆ మనసుకి ఈ జన్మని అంకితం ఇస్తానని మాటిస్తూ..

అన్నింటికీ మించి ప్రేమ పోతపోసిన

ఆ అందాన్ని నా కళ్ళలో ధరిస్తూ..

ఆ ప్రణయ బంధాన్ని నా గుండెల్లో బంధించుకుని..

ఒక హృదయస్పర్శ ఇవ్వనా???

***

అది చాలదా..

స్వచ్ఛమైన స్త్రీ కోరేది

స్వేచ్ఛాయుతమైన ప్రేమ హృదయం మాత్రమే కదా!!

--

హరి