కవచం

కాల యముడితోనైనా 

పోరాడి ప్రాణాన్ని ఫణంగా పెట్టి 

పురుడు పోసే ప్రాణ ప్రదాత 

కట్టెల పొయ్యి దగ్గర కళ్లెర్ర బారిన 

భారంగా కాకుండా 

బాధ్యతగా భావించి బువ్వొండి  

ఆకలి తీర్చే అన్నపూర్ణ 

కొండంత కన్న ప్రేమతో 

తన ఒడినే తొలి బడిగా మార్చి 

ఓనమాలు దిద్దించి అక్షర జ్ఞానాన్ని 

ప్రసాదించే ఆది గురువు 

అనారోగ్యంతో 

దవఖానా పాలయితే 

కంటికి కునుకు లేకుండా 

సేవ చేసి, కాపు కాచే రక్షణ కవచం 

తన ఆశలను సమాధి చేసుకొని 

కుటుంబమే సర్వస్వంగా 

అయినోళ్ళకై చివరి మజిలీ దాకా 

శ్రమించే ఓ నిస్వార్ధ త్యాగశీలి... అమ్మ...!

అన్నింటా తానై అణువణువూ 

అండగా నిలిచే మన అమ్మకు 

ఎన్ని జన్మలెత్తిన తన ఋణం తీర్చలేం...

కనకపు రాసులనే తన నెత్తిన పోసి 

అభిషేకం చేసిన తన త్యాగం ముందు 

అంతా శూన్యమే...!

అంతటి హృదయ వైశాల్యమైన 

వ్యక్తిత్వం ఒక్క అమ్మకే సొంతం 

ఒక్క అమ్మకు మాత్రమే సొంతం..!