కొత్త పలుకు

భవిష్యత్తు మబ్బులా కరుగుతూ 

వర్తమానమై వర్షించి

గతసముద్రంలో కలిసిపోతోంది

కొండంత చీకటిని తొలుచుకుంటూ 

వెలుగు కిరణం తొంగిచూసింది

పుడమి గర్భాన్ని చీల్చుకుంటూ

మొక్కయొక్కటి మోరయెత్తింది

ఉగ్గపట్టిన వేదనకి

విమోచననిస్తూ

పొలికేక ఒక్కటి పిక్కటిల్లింది

కలికాలపు వంచనలు

కలకాలం సాగవంటూ

విప్లవ గీతమొక్కటి వెల్లివిరిసింది 

కడలితల్లి వొడివీడి పడుచుఅల

ఇసుకతిన్నెతో ఊసులాడింది

గలగలలాడే మావిడికొమ్మ

కోయిలమ్మతో మేలమాడింది

ఎగసిపడే భావాల కొలిమిలో

శిశిరాక్షరాలు రాలి కవిత పుట్టింది