జ్ఞాపకాల గంగలోన

జ్ఞాపకాలు గంగలోన..కలపడమే కుదరదులే..! 

నీ మనస్సు ఖాళీగా..చేసుకోగ కుదురునులే..! 

ప్రేమన్నది ప్రధానముగ..ఒక మాయా నాటకమే.. 

ఎఱుకలోన ఉన్నావా..ప్రమాదాలు ఉండవులే..! 

నవ్వైనా ఏడుపైన..అద్భుతమౌ ఆయుధాలె.. 

ప్రయోగించు కుశలతయే..అతీతముగ ఉంచునులే..! 

ఎన్ని బొమ్మలుంటేనేం..ఆట సాక్షి కావాలోయ్..

బుద్ధి చేతి కీలుబొమ్మ..మనసైతే శాంతములే..! 

ఈ మాయా జగతికన్న..ఆత్మబంధు వింకెవ్వరు.. 

ఈతనువే మౌనగురువు..పాఠాలను నేర్పునులే..! 

నామరూప రహితబ్రహ్మ..సకలజీవ దైవతమే.. 

దివ్యప్రేమ రహస్యమది..ధ్యానముతో అందునులే..!