ఇంతకీ అతనేమయ్యాడు

ఇంతకీ అతనేమయ్యాడు

లోకమంతా నల్లటి కాటుక పూసుకుంది

ఇంతకీ అతనేమయ్యాడు....!?

నిజం మెరుపు దుప్పటి కప్పుకుంది

ఇంతకీ అతనేమయ్యాడు....!?

ఎడారి నిండా ఒకటే అబద్ధపు వరద

ఇంతకీ అతనేమయ్యాడు....!?

నమ్ముకున్న సిద్ధాంతాలు కళ్ళకు గంతలు కట్టాయో

ఒకే కోణపు దాడులు నోట్లో గుడ్డలు కుక్కాయో

అతడు లేడు....!?

ఏనాడో గీసుకున్న రాత ఇంకా చెరిగిపోలేదో

నిన్నా మొన్నటి నానుడులు పాచి పట్టి పోయాయో

అతడు రాడు.....!?

అవునతను

తనలా మిగిలుండలేడు

వేరెవరిలా మారడానికి ఇష్టపడనూ లేడు

అవునతను

తన మీద తనకు నమ్మకాన్ని పెంచుకోడు

వేరెవరి అపనమ్మకాన్నీ మోయనని దిక్కరించడు

అతనందుకే

మాయమయ్యాడు....

అతనందుకే

నిర్'జీవమయ్యాడు'

సుధామురళి