ఈ వెన్నెల్లో...

పున్నమంటి చెలిచిత్రం గీయాలని తలచాను 

పుచ్చపూల కాన్వాసుగ మారుతోంది ఈ వెన్నెల 

ఒంటరైన ప్రేమికులతొ వైరం తనకెందుకో

నేస్తమైన విరహానికి చూపుతోంది ఈ వెన్నెల

చీకటిపై కాంతిపూలు జల్లుతోంది ఈ వెన్నెల 

చలచల్లని బాణాలను రువ్వుతోంది ఈ వెన్నెల

తీరకాంత కొప్పులోన మెరవాలని ఉన్నదేమొ

తరగలపై మల్లెలుగా మారుతోంది ఈ వెన్నెల 

చందమామనొంటరిగా క్షణమైనా విడువదులే 

కలువపూల కళ్ళలోకి జారుతోంది ఈ వెన్నెల

ప్రణయించే జంటలన్ని తనకంట్లో పడెనెమో

జాబిల్లిని మబ్బు(ముగ్గు)లోకి లాగుతోంది ఈ వెన్నెల

సుగంధాన్ని తనమేనికి పూసుకుంటు...

జాజిపూల తీగలపై పాకుతోంది ఈ వెన్నెల...