ఈ జన్మకు ఈ వరమే

నిన్ను అలా చూస్తూనే..ఉండవలెనని ఉన్నది..! 

ఈ జన్మకు ఈ వరమే..అడుగవలెనని ఉన్నది..! 

ఎన్నిలోకా లున్నవో..పనేలేదు తెలియగా..

నీవె నా లోకమన్నది..చెప్పవలెనని ఉన్నది..! 

ప్రేమించే తీరేమో..పాఠమెలా నేర్వగా.. 

నీ చెలిమికి అద్దంలా..నిలువవలెనని ఉన్నది..! 

మనసులోని అలజడితో..తడబడెనా అడుగులు.. 

నీ చూపుల నీడపట్టు..చేరవలెనని ఉన్నది..! 

నీవు-నేను ఒక్కటైన..కనిపింతుము ఎవరికి.. 

ఏకాంతపు గగనమందు..తేలవలెనని ఉన్నది..! 

ఆశపడే ముచ్చటేమి..మిగిలిలేదు నాలో.. 

'నేను-నాది' సమర్పణము..చేయవలెనని ఉన్నది..!