ఎగరాలని వుంది
ఎగరాలని వుంది
నాకోసమే జీవించాలనుంది
ఆడపిల్లనే పంజరం నుండి
స్వేచ్ఛకు వేసిన సంకెళ్లను తెంచి
ప్రకృతిలో పచ్చని చిలుకలా
స్వచ్ఛమైన రెక్కలు తొడిగి
ఎగిరి పోవాలని వుంది
నాదైన ప్రపంచంలో
నాకై నేను వసించాలని
నా మనసులోని సంకుచిత
భావాల్ని ఉండచుట్టి గాలిలో
పతంగంలా ఎగరేయాలని వుంది
ముళ్ళకంపల చిక్కులను విప్పుకుని
విహంగంలా విహరించాలనుంది
గిరి గీసిన పరిధిని దాటి
హద్దులు లేని ఆనందంతో
గెంతులేయాలని వుంది
నాలోకి నేను తొంగి చూసుకుంటూ
నాకై నేనుగా నాతో నేను సాగుతూ
ఈ విశాల ప్రపంచంను
మరింత అందంగా ఆస్వాదించాలనుంది