ఏమా మౌనం

ప౹౹

ఏమా మౌనం ఎదలోని ఆ కోరిక వెల్లడించ 

ఏదో ధ్యానం మదిలోని మాట వెలువరించ ౹2౹

చ౹౹

చూసి చూసి కన్నులేమో అలసిసొలసేనులే

వేచి వేచి మనసేమో వెనకడుగూ వేసేనులే ౹2౹

కలలను మానేసినా కన్నులకు కలవరమేగ

ఆశలు ఊసెరగని మనసులో కలకలమేగ ౹ప౹

చ౹౹

ఎన్నాళ్ళీ ఎదురు చూపులు తలపే తెలుప

మూన్నాళ్ళ మచ్చట కాకూడదే ఎద కలుప ౹2౹

ఆమని అడిగిన వేళనే పాటనై ప్రభవించగా

కోరిక కొసరిన ఆపూల తోటనై పల్లవించగా ౹ప౹

చ౹౹

ఏదో రాగం ఎదలోనా ఝమ్మని రాణించగా

ఎడదమొత్తమే వేకువ కోయిలై రవళించగా ౹2౹

వేయి వరములే మరి ఏకమై కురిసినట్లుగా

రేయి వెన్నెలలు ఆలాపనలే అందించెనుగా ౹ప౹