చుట్టరికం

పరిమళించే పూవుకేది..చూపగల్గు చుట్టరికం..! 

ప్రజ్వలించే నిప్పుకేది..అంటగల్గు చుట్టరికం..!

కులపురొచ్చు అధిగమించు..మానవత్వం ఎక్కడ..

కురియువాన మబ్బుకేది..నిలుపగల్గు చుట్టరికం..!

తాడులేని తోడులేని..నీడ ఏదీ లేదుగా..

కాంతిపూల చెట్టుకేది..దాచగల్గు చుట్టరికం..!

మతం మించి పిశాచమే..లేదు నిజం తెలియనిదా..

ప్రేమపంచు మనసుకేది..పట్టగల్గు చుట్టరికం..!

ఫలితమింత ఆశించక..పనిచేస్తే లోటేమిటి..

తెలియజెప్పు పలుకుకేది..తెలుపగల్గు చుట్టరికం..