చంద్రమోహనుడు

తేటగీతి.

*చంద్రమోహనుడు*

చంద్రమోహనుడను మేటి చలన చిత్ర

నటుడు సీమవీడి దివికి నడిచిపోవ

నతని కౌశలముఁ బొగడి యాదరమున

దిగులుతో నివాళి నిడిరి తెలుగువారు.//

మంచి నటుడిగా సీమలో మసలినాడు

పోరు నెరుగని సౌమ్యుడీ పుణ్యశీలి

పొట్టివాడట!జూపి తాన్ గట్టినటన

పెద్ద నటుల నోడించుచు పేరుపొందె.//

నాయికామణులకు నేర్ప నటనయందు

మెళకువలు నాటి తారలు తళుకు మనిరి

పిన్న పాత్రలఁ నటియించి పెరిగి పెరిగి

విక్రమించిన నటుడాయె వివిధగతుల.//

విశ్వనాధుని చిత్రాల పెన్నిధి యన

తెలుగు సీమకు కీర్తిని తెచ్చిపెట్టి

నొదిగి యుండెడి శాంతుడై నోర్పుతోడ

పెద్ద తనమును జూపెడి ప్రేమమూర్తి.//

పాత్ర యేదైన కానిండు వాసిగాను

జేసి చూపించు చంద్రుడీ స్థిరమతుండు

శాశ్వతంబుగా నిల్చునీ సజ్జనుండు

ప్రజల మదిలోన: వానికి వందనములు.//