మాల్యాద్రి

తేటగీతిపద్యములు.

1.

సాధు వర్తన మీయవే శార్ఙ్గపాణి!

దుష్ట గుణముల దూలింపు దోషహరణ!

పాప కర్మలు వారించి పద్మనాభ!

నన్ను పాలింపు మాల్యాద్రి నారసింహ!//

2.

కాల కంఠుని పాశంబు కంఠమందు 

బిగుసు కొన్నట్టి క్షణమందు వీడిపోక 

దయను జూపవె యాత్మకు ధైర్యమొసగి

నన్ను పాలింపు మాల్యాద్రి నారసింహ!//

3.

పాంచ భౌతికదేహమ్ము పట్టు సడలి 

కన్ను మూసెడి క్షణమందు గాంచవయ్య 

ధైర్య మించుక లేనట్టి దారి యందు 

నన్ను పాలింపు మాల్యాద్రి నారసింహ!//

4.  

కష్ట సుఖముల బడయుచు కాల మందు 

నొడ్డు జేరక తిరిగెడి యోడ వోలె 

నిండ మునిగిన నాకింత నెరవు జూపి 

నన్ను పాలింపు మాల్యాద్రి నారసింహ!//

5.

కాల చక్రపు టిరుసునఁ గలియ దిరిగి 

విసివి వేసారి తుదకిల వెతలు బొంది 

మరచి పోయితి మనమెల్ల మాయ గప్పె 

నన్ను పాలింపు మాల్యాద్రి నారసింహ!//