బాటసారినై

నేనెవరో తెలిసికూడ తెలియనట్టు బ్రతకలేను..! 
అన్నింటా అందరిలో..నినుచూడక ఉండలేను..! 

ప్రేమకు నిజచిరునామా..అందుకోగ యాతనేమి.. 
నీ దు:ఖం నీ బాధా..తీర్చకుండ కదలలేను..! 

బాటసారినై మిగిలా..ఈపూవుల తోటలోన.. 
పూవులేవి తెంచలేను..పూజించక నిలువలేను..! 

నాకథకో సూత్రధారి..ఇంకెవరో ఇంకెక్కడ.. 
పాత్రకెలా అంటకుండ..ఉండాలో చెప్పలేను..! 

నీ లోపలి నాతీరుకు..అచ్చెరువే కలుగుచుండు.. 
మౌనం నా సంపదంటు..పెదవివిప్పి పాడలేను..! 

గురిపెట్టిన ఒక తుపాకి..బుల్లెట్లే అనుభవాలు.. 
చిరునవ్వుల వెన్నెలనే..కవచమసలు తీయలేను.