అమోఘ మేఘమాల

అమోఘ మేఘమాలతో కనువిందు అయ్యెను నీలమైన అనంత ఆకాశం,

మేఘజ్యోతి మేఘనాదంతో ఆర్ద్ర శీతలప్రద వర్షపాతం చేసెను ప్రవేశం,

చిరుజల్లు చిటపట చినుకులతో అనార్ద్ర వసుంధర పొందెను పరవశం,

తరులతల ఆకులపై వర్షపు చుక్కల నృత్యం ఓ అందమైన సన్నివేశం |౧|

ఝంఝతో స్తంభించిన ప్రకృతిలో మఱల వచ్చెను క్రొత్త లయం,

నీరస ఊసరక్షేత్రంలో హరిత శోభన తేవటంలో చేసెను సహాయం,

జలధరులు జలకళతో ఊరక జలాశయాలను చేసెను జలమయం,

అనుపమ ఉపవన సరోవరాలలో విమల జలం ఎంతో అద్వితీయం |౨|

ఘనాఘన మబ్బుల తెర వెనుక దాగెను సూర్య చంద్ర తారాగణం,

వీక్షించవలెను సప్తరంగుల ఇంద్రధనుస్సు ఇంద్రజాల నిర్మాణం,

వానజల్లుతో నిర్మలమయ్యెను ఇహలోకంలో ప్రాకృతిక వాతావరణం,

ధరణిపై కమనీయం రమణీయం ఈ అమోఘ మేఘమాలల వర్షణం |౩|