అక్షర హాలికుడు

కొవ్వొత్తిలా కరిగిపోతున్నా 

జ్ఞాన వెలుగులందిస్తూ

అజ్ఞానపు చీకట్లు తొలగించి 

జగతిని జాగృతం చేసే 

జ్ఞాన భాస్కరం అతడు

శిష్యగణ మెదడు పొలంలో 

అక్షర విత్తులు నాటి

పదాల రాశులతో 

వాక్యాల పంటను నిర్విరామంగా పండించే 

అక్షర హాలికుడు అతడు

జ్ఞాన చమురు నింపి

శిష్య రథాన్ని ప్రగతిబాట పట్టించి

గెలుపు తీరాలకు చేర్చే 

రథ సారథి అతడు

కఠినమైన కార్యమైనా

చెంత చేయుతగా నిలిచి

నేర్వడంలో వేసే తప్పటడుగులను                     సరిచేసే మాతృమూర్తి అతడు

నాలుగు మూలల మధ్య నడత నేర్పి 

నలుదిశలా విస్తరింపజేసే

తరిగిపోని విలువల సంపదనందించే

జ్ఞాన కల్పతరువతడు

అభ్యాస జీవితాన్ని గాడిలో పెట్టి

చక్కదిద్దడంలో పితృసమానుడై

బతుకు బండిని క్షేమంగా 

గమ్యం చేర్చే మార్గదర్శి