ହେଇ ପରା ଏବେ ଆସିଲା

ଗାଈଗୋଠ ନେଇ-ବନରୁ କହ୍ନେଇ

ହେଇପରା ଏବେ ଆସିଲା,

କଣେଇ କଣେଇ-ଇଆଡ଼େ ଅନେଇ

ମୁରୁକି ମୁରୁକି ହସିଲା ।(୦)

ସଖା ମେଳେ ବାଇ ମୋହନ ମୁରଲୀ ,

କେତେ ରଙ୍ଗେ ଆସୁଥିଲା ସେ ଦୋହଲି ।

ବନଫୁଲ ନାଇ ଗଲାବେଳେ ଚାଲି

ମହମହ ଖାଲି ବାସିଲା ।(୧)

କଣେଇ କଣେଇ-ଇଆଡ଼େ ଅନେଇ

ମୁରୁକି ମୁରୁକି ହସିଲା ।

ଏଡ଼ିକି ସିଆଣା ହୋଇଲାଣି ସିଏ ,

ମୁହେଁ ମୁହେଁ ଖାଲି ଉତ୍ତରଟି ଦିଏ ।

ଯମୁନା ଘାଟରୁ ବାସ ଲୁଟି ଇଏ

ସେଦିନ ତ ଡାଳେ ଖୋସିଲା ।(୨)

କଣେଇ କଣେଇ -ଇଆଡ଼େ ଅନେଇ

ମୁରୁକି ମୁରୁକି ହସିଲା ।

ସେ ନଟ ନାଗର କଲେ ଯେତେ ଯାହା,

ନିମିଷକେ ଭୁଲି ହୋଇଯାଏ ତାହା ।

ବିପଦେ ଆପଦେ ହୁଏ ଯେଣୁ ସାହା

ସେ ଲାଗି ମନଟି ମିଶିଲା ।(୩)

କଣେଇ କଣେଇ -ଇଆଡ଼େ ଅନେଇ

ମୁରୁକି ମୁରୁକି ହସିଲା ।

ଗାଈଗୋଠ ନେଇ-ବନରୁ କହ୍ନେଇ

ହେଇପରା ଏବେ ଆସିଲା ,

କଣେଇ କଣେଇ-ଇଆଡ଼େ ଅନେଇ

ମୁରୁକି ମୁରୁକି ହସିଲା ।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।