ଆହାରେ ନାହିଁ ଭଲମନ୍ଦ

ଆହାରେ ଶୁଦ୍ଧତା ସମୟାନୁବର୍ତ୍ତିତା

ପ୍ରସ୍ତୁତିରେ ଲୋଡା ଶ୍ରଦ୍ଧା

ବୁଝେ ନାହିଁ କିଛି ଭଲ ଅବା ମନ୍ଦ

ବାଧା ପ୍ରତିବନ୍ଧ କ୍ଷୁଧା ।

ଆପଣାର ରୁଚି ପସନ୍ଦର ଖାଦ୍ୟ

ମିଳେ ନାହିଁ ସବୁବେଳେ

ନାକକୁ ଟେକିଲେ ରୁଚେ ନାହିଁ କିଛି

ଭୋକ ନିଆଁ ପୋଡି ଜାଳେ ।

ସ୍ଥାନ କାଳ ପାତ୍ର ଭେଦ ବିଶେଷରେ

ଖାଦ୍ୟଦ୍ରବ୍ୟ ଉପଲବ୍ଧି

ପ୍ରସ୍ତୁତି ପ୍ରଣାଳୀ ହୋଇପାରେ ଭିନ୍ନ

ବ୍ୟଞ୍ଜନ ଓ ଶାକସବ୍ଜି ।

ଆହର ସୁଷମ ଦେଇ ତୀକ୍ଷ୍ଣ ଧ୍ୟାନ

ଖାଦ୍ୟ ପୌଷ୍ଟିକ ଉତ୍ତମ

ଯେଉଁ ଦେଶ ଯିବ ସେ ଫଳ ଖାଇବ

ବାରିବନି ଭଲ ମନ୍ଦ ।

ଅଛି ନୀତିକଥା ଭାଗବତ ବାଣୀ

କରିବନି ଘୃଣା ଲାଜ

ସୁବିଶ୍ୱାସେ ଖାଦ୍ୟ କରିଲେ ଗ୍ରହଣ

ବୃଦ୍ଧି ହୁଏ ବଳ ତେଜ ।