ପ୍ରେମରେ ପଡ଼ିବା ପରେ
ପ୍ରେମରେ ପଡ଼ିବା ପରେ
ଅଜିତ୍ କୁମାର ସେଠୀ
ଜହ୍ନକୁ ପଚାରିଲି
କଇଁ ପାଇଁ ଏତେ ତମ ଦରଦ କାହିଁକି ?
ଜହ୍ନ କହିଲା
ଥରୁଟିଏ କାହାକୁ ମନ ଦେଇ ଦେଖ
ଆପେ ଆପେ ସବୁ ବୁଝିଯିବ l
ସାଗରକୁ ପଚାରିଲି
ନଈକୁ କୋଳେଇ ନେବାକୁ
ଏତେ ତମେ ବ୍ୟାକୁଳ କାହିଁକି ?
ସାଗର କହିଲା
ଥରୁଟିଏ କାହାକୁ ହୃଦୟ ଦେଇ
ଭଲ ପାଇ ବସ
ଆପେ ଆପେ ସବୁ ଜାଣିଯିବ l
ଭଅଁରକୁ ପଚାରିଲି
ଫୁଲରେ ଓଠ ରଖି
ଏତେ ତୁମେ ଝୁମୁଥାଅ କାହିଁକି ?
ଭଅଁର କହିଲା
ପ୍ରିୟାକୁ ପ୍ରାଣ ଭରି
ପ୍ରେମ କରି ଦେଖ ତ
ତୁମ ପାଇଁ ଆଉ କିଛି ଅବୁଝା ନ ଥିବ l
ଏବେ ମୁଁ ବୁଝୁଛି
ତାର ପ୍ରେମରେ ପଡିବା
ମୋ ପ୍ରଶ୍ନର ଉତ୍ତର ସବୁ
ଏବେ ମୋରି ପାଖରେ l