આવે રડવું તે છતાં હસવું પડે

આવે રડવું તે છતાં હસવું પડે,

એક નાટક છે રજુ કરવું પડે,

એકલો ઘોંઘાટ ના કર તું અહીં,

મૌન તારે પણ અનુસરવું પડે,

શક્ય હો અવકાશ જો મેળાપ નો,

તો સફર છોડી પરત ફરવું પડે,

હો ભલે છેટો કિનારો શું થયું,

એક શ્વાસે આપણે તરવું પડે,

અંત તો આવી ગયો છે પીડ નો,

આ અતીતોથી હવે સરવું પડે,

રીત આ સામીપ્યની ના પાલવે,

એક સાથે બેઉ ને મરવું પડે,

બીક કયાં "પાગલ " હવે છે કોઇની,

જાત થી જાતે જ તો ડરવું પડે.