રાહમાં

રાહમાં મળશે જો આંબો, 

તો પૂછી લઈશ કેરીનો ભાવ, 

મળ્યો એ આંબો ને પૂછ્યું, 

તો કે, વહેંચવું મારો સ્વભાવ ! 

રાહમાં મળશે જો વડ, 

તો પૂછી લઈશ છાંયડાનો ભાવ, 

મળ્યો એ વડલો ને પૂછ્યું, 

તો કે, વહેંચવું મારો સ્વભાવ ! 

રાહમાં મળશે જો રેવા, 

તો પૂછી લઈશ પાણીનો ભાવ, 

મળી એ રેવા ને પૂછ્યું, 

તો કે, વહેંચવું મારો સ્વભાવ,

રાહમાં મળશે જો મોગરો, 

તો પૂછી લઈશ સુગંધનો ભાવ, 

મળ્યો એ મોગરો ને પૂછ્યું, 

તો કે, વહેંચવું મારો સ્વભાવ,

રાહમાં મળશે જો મોરલો, 

તો પૂછી લઈશ ટહુકાનો ભાવ, 

મળ્યો એ મોરલો ને પૂછ્યું, 

તો કે, વહેંચવું મારો સ્વભાવ,

રાહમાં મળશે જો જંગલ, 

તો પૂછી લઈશ શાંતિનો ભાવ, 

મળ્યું એ જંગલ ને પૂછ્યું, 

તો કે,વહેંચવું મારો સ્વભાવ,

રાહમાં મળશે જો મેહુલો,  

તો પૂછી લઈશ ઠંડકનો ભાવ, 

મળ્યો એ મેહુલો ને પૂછ્યું, 

તો કે,વહેંચવું મારો સ્વભાવ,

રાહમાં મળશે જો માણસ, 

તો પૂછી લઈશ માનવતાનો ભાવ, 

મળ્યો એ માણસ ને પૂછ્યું, 

તો કે, ભેગું કરવું મારો સ્વભાવ.