ગીત - 'પ્રેમ શબ્દ છે સત્ય '

પ્રેમ શબ્દ છે સત્ય ....

જળ કે સ્થળમાં જીવ માત્રનું એક અદીઠું સત્ય 

પ્રેમ શબ્દ છે સત્ય ....

અંધારામાં ના દેખાતી અજવાળાની બારી 

ઝીણાં તરલિયાથી ગુંથે નભમાં એક અટારી 

અચળ - વિચળ ને સચરચરમાં એક જ ઉઘડે કથ્ય 

પ્રેમ શબ્દ છે સત્ય ....

યાદોમાં પડઘાતાં ઘૂમે શમણાં ભીનાં - ભીનાં 

બંધ હોઠમાં વાતો કરતાં એ તો ધીમા - ધીમા 

મેઘધનુષી રંગ સમુ એ ઉઘડેલું આતિથ્ય 

પ્રેમ શબ્દ છે સત્ય ....

એક ઈશારો એનો થાશે દોડી જાશું મળવા 

લોક લાજને પડતાં મેલી પ્રેમ રંગમાં ઢળવા 

મીરાંની મટુકીમાં મોહન તું માખણ , તું તથ્ય 

પ્રેમ શબ્દ છે સત્ય ....