ଯନ୍ତ୍ରଣା
ଯନ୍ତ୍ରଣା
ଜୀବନର ଜଉଘରେ ଯନ୍ତ୍ରଣାର ସ୍ୱର ।
ଘୁମୁରି ଘୁମୁରି କାନ୍ଦେ ମନ ପାରା
ଆଶା-ଆକାଶ ଛାତିରେ ଉଡିବାର ପାଇଁ।
ବିଶ୍ୱାସ ଘାତକତାର କଳା ବାଦଲରେ,
ଆକାଶର ଅଗଣାରେ ପେନ୍ଥା ପେନ୍ଥା
ଅନ୍ଧକାର ଛାଇ।
ଛଳନାର ଯୂପକାଠ ତଳେ
ଦଗ୍ଧୀଭୂତ ସରଳ ବିଶ୍ୱାସ ।
ଜ୍ୱଳନର ଉତ୍କଟ ଗନ୍ଧରେ ଖାଲି
ଆକ୍ତା ମାକ୍ତା ତମାମ ପ୍ରଶ୍ୱାସ ।
ହୃଦୟ ଓ ଆତ୍ମାକୁ କବଳିତ କରି
ଯନ୍ତ୍ରଣାର ହିଲ୍ଲୋଳ ସବୁ ଝରିଯାଉଥାଏ
ପାଣି ହୋଇ, ଆଖିର ଝରକା ଦେଇ
ଦେହର ଦେହୁଳି ଡେଇଁ ।
ଆଉ ସେହି ଅଶ୍ରୁ ଜଳ ଧାରେ
ଭାସି ଭାସି ଯାଉଥାଏ ଜୀବନର ଜଉଘର
ସୁଅ ମୁହେଁ ପତରଟି ପରି ।
ପୁଣି କେବେ କେବେ!
ଘନଘନ ଦୀର୍ଘଶ୍ୱାସର ତତଲା ଛୁଆଁରେ
ଜୀବନର ଜଉଘର ଜଳୁଥାଏ କୁହୁଳି କୁହୁଳି ।
ଦିକି ଦିକି ନିଆଁ ତଳେ ପୋଡି ପୋଡି ଯାଉଥାଏ
ଚମଡା ମାଉଁସ ମଖା ମାଟି ପିଣ୍ଡଟିଏ ।
ଚମଡା ମାଉଁସ ମଖା ମାଟି ପିଣ୍ଡଟିଏ ।