ଯୌଥ ପରିବାର
ଯୌଥ ପରିବାର
ବୈକୁଣ୍ଠ ସମାନ ଅଟେ ସେଇ ଘର
ପରସ୍ପର ସ୍ନେହ ଥାଏ ନିରନ୍ତର
ଲୋଡ଼ା ହୁଏ ନାହିଁ ଧନ କି ସମ୍ପଦ
ଥିଲେ ଯୌଥ ପରିବାର ।
ବାପା ବୋଉ ଭାଇ ଭଉଣୀ ସମେତ
ଜେଜେ ,ମା ଦାଦା ଖୁଡ଼ି
ଏକ ଛାତ ତଳେ ରହୁଥିଲୁ ସର୍ବେ
ସତେକି ସରଗ ପୁରୀ ।
ଗୁରୁ ଗୁରୁଜନେ ଯଥା ସନମାନ
ଲଘୁ ଜନେ ସ୍ନେହ ଶ୍ରଦ୍ଧା
ନଥିଲା ସେ ଠାରେ ମୁଁ ' ର ହୁଙ୍କାର
ଆମେ ଭାବନା ରେ ବନ୍ଧା ।
ହସ ଖୁସି ନେଇ ମନ ଆନନ୍ଦ ରେ
କଟିଥିଲା ଆମ ଦିନ
ଦୁଃଖ ସୁଖ ସବୁ ବାଣ୍ଟି ନେଉଥିଲୁ
ନ ଥିଲା ବିଷାଦ ଚିହ୍ନ ।
ଆଜିକା ଜମାନା ବଡ଼ ସ୍ୱାର୍ଥପର
ଭାଇ ଭାଇ ହୋଇ ଭିନେ
ବାପା ବୋଉ ଙ୍କର ଖାଇବା ରହିବା
ପାଳି ହୁଏ ଦିନେ ଦିନେ ।
ଘର ମଝିଟାରେ ପାଚେରୀ ଉଠଇ
ବିଲ ର ମଝିରେ ହିଡ଼
ସମ୍ପତି ପାଇଁ କି ରକତ ରେ ଗାର
ଭାଇ ଭାଇ ମଧ୍ୟେ ଝଡ଼ ।
ଯେତେ ଯେତେ ଶିକ୍ଷା ଲଭୁଚି ମଣିଷ
ସେତେ ଗ୍ରାସେ ଅହଂକାର
ସତେ ଅଯାଣତେ ତ୍ରୁଟି ରହିଗଲା
ଆମ ଶିକ୍ଷା ବ୍ୟବସ୍ଥାର ।