ଯାଉଛୁ କାହିଁ ନେଉଳ ଭାଇ

    ଯାଉଛୁ କାହିଁ ନେଉଳ ଭାଇ

       ଧାଇଁଛୁ ଏଡେ ଖରେ

    ଖାଇବୁ ଦେବି ପାକଲା କେନ୍ଦୁ

       ଆସ ତୁ ଆମ ଘରେ ।। 

    ପଶମ ଲୋମ ଦେହରେ ତୋର

       ମାଖି ମୁଁ ଦେବି ତେଲ

    ଗାଧେଇ ଖାଇ ଆମରି ଘରେ

       ହୋଇବୁ କେତେ ଗେଲ ।। 

    ଖୁସି ଖୁସିରେ ବଡ ମଜାରେ

       ବୁଲିବୁ ଘର ସାରା

    ଦେଖିବୁ ବୁଲି ଆମରି ପୋଷା

       ବିରାଡ଼ି, ଶୁଆ, ପାରା ।। 

    ସଭିଏଁ ଆମେ ଏକାଠି ହୋଇ

       ଖେଳିବା ନାନା ଖେଳ

    ଲୁଚିବୁ ତୁହି ଖୋଜିବୁ ଆମେ

       ଜମିବ ଆମ ମେଳ ।। 

    ବୁଦିବୁଦିକା ଗଛ ଭିତରେ

       ଲୁଚିବୁ ଯେବେ ଯାଇ

    ଦେଖିବି ତୋତେ ମାରିବି ତାଳି

       ଘର ଭିତରେ ଥାଇ ।। 

    କହନ୍ତି ମାଆ ସାପଟା କାଳେ

       ତୋହରି ବଡ ଅରି

    ତୋ ଦିନ କଟେ ତାହାରି ସାଥେ

       ଝଗଡା କରି କରି ।। 

    ସରିଲେ ଖେଳ ଯିବୁନି ଚାଲି

       ମୋ ପାଶେ ଯିବୁ ରହି

    ପଢିବୁ ପାଠ ତୋ ପାଇଁ ଆଣି

       ଦେବି ମୁଁ ଛବି ବହି ।। 

    ତୁଉ ପଢିଲେ ମୁଉଁ ପଢିବି

       ମୁଉଁ ପଢିଲେ ତୁଉ

    ପଢିଲେ ପାଠ ପାଠୁଆ ଆମେ

       ହେବାରେ ତୁଉ ମୁଉଁ ।।