ଯାଉଛି ଏଇଠି ଲେଖି

ଦେଖା ହେବା ପାଇଁ       ଡକାଇ କିପାଇଁ

           ଧରି ମଧ୍ୟ ମୋର ହାତ

ଏତେ ଦିନ ପରେ        ବିଶ୍ୱାସ ଉପରେ

            କରୁଛ କୁଠାର ଘାତ ?

ମନେ ଅଛି କିବା      ହେବ ବୋଲି ବିଭା

          କଥା ଦେଇ ତୁମେ ମିତ୍ର

ନିର୍ଜନ ପଥରେ          ଥିବା ଏ ପଥରେ

          ଗାରେଇ ଥିଲ ଏ ଚିତ୍ର ।

ଖେଳୁଖେଳୁ ସାଥେ   ଛୁଇଁ ମୋର ମାଥେ

          କରିଥିଲ ଯେତେ ପଣ

ବିତେ ବର୍ଷ ମାସ          ପଚାରିବ ଆସ

           ସାକ୍ଷୀ ଅଛି ଗିରି ବଣ ।

ଅଶ୍ରୁ ସିନା ପାତେ      ଖୋଦିଥିଲ ହାତେ

          ପ୍ରେମର ପ୍ରତିମା ଯେଉଁ

ଲିଭି ନାହିଁ ତାର        ଆଲମ୍ବ ସେ ଗାର

         ଆଶରା ଆଶାରେ କେଉଁ ।

ସ୍ମାରକକୁ ଭେଟି       ଆଜି ଯେବେ ଏଠି

             କରୁଅଛି ବିହରଣ

ଉପଳର ପୃଷ୍ଠେ       ଚିତ୍ର ଦେହେ ଉଠେ

             ଅବିରତ ଶିହରଣ ।

କହି କିସ ଲାଭ            ହୃଦୟର ଭାବ

           ଅନାବିଳ ଥିଲା ମୋର

କିବା କେଉଁ ଦୋଷେ  ଛାଡିଗଲ ରୋଷେ

           ଛିଣ୍ଡାଇ ବନ୍ଧନ ଡୋର !

ସ୍ମୃତି ଏ ଅଜର             ପକାଇ ନଜର

           ଏଯାଏଁ ରହିଛି ଦେଖି

ମନେ ବହି ଆଣ୍ଟ           ଜଗିଥିବି ବାଟ

           ଯାଉଛି ଏଇଠି ଲେଖି ।

କଲେ ବି ରୋଦନ    ମନ ମୋ ଶୋଧନ

           ପାରୁନାହିଁ ଆଉ କରି

ଆସିଗଲେ ଫେରି  ବାହୁରେ ମୋ ଘେରି

           ଆଶ୍ଳେଷ ଦିଅନ୍ତି ଭରି ।