ଯାତରା ଦେଖା

କୁନିର ମୁହଁଟି ଯାଇଛି ଶୁଖି

କୁନି ଚାହେଁ ଯିବ ଯାତରା ଦେଖି

ବୋଉ ସାଥେ ବୁଲି

ରାମ ଦୋଳି ଝୁଲି

ଦେଖିବ ନାଟକ ଚନ୍ଦରମୁଖୀ ।।

ବୋଉର ବାଟକୁ ବସିଛି ଚାହିଁ

ବୋଉର ଏ ଯାଏଁ ଦେଖା ତ ନାହିଁ!

ମନ ତାର ଦୁଃଖ

କେହି ନାହିଁ ଲୋକ

ଯିଏ ନେବ ତାକୁ ମେଳା ବୁଲେଇ ।।

ଭାବୁଅଛି କୁନି ମନକୁ ମନ

ସଞ୍ଚିଅଛି ସିଏ ଯେତେକ ଧନ

କିଣିବ ସେ ଯାଇ

ସେଇ ଧନ ଦେଇ

ହାତୀ ଘୋଡ଼ା ଆଦି ଖେଳନାମାନ ।।

ବାପା ଥିଲେ ପାଖେ ହୁଅନ୍ତା ମଜା

ଫୁଙ୍କି ପେଏଁକାଳି ବଜେଇ ବାଜା

କାନ୍ଧରେ ବସେଇ

ନିଅନ୍ତେ ବୁଲେଇ

ଖୁଆଇ ଥାଆନ୍ତେ ମିଠେଇ ଖଜା ।।

ବାପା ତାର ଏବେ ଦୂର ଦେଶରେ

ବୋଉ କମ୍ପାନୀରେ ଚାକିରି କରେ

ଜଗି ଜଗି କୁନି

ଶୋଇଯାଏ ତୁନି

ବୋଉ ନିତି ଅଧ ରାତିରେ ଫେରେ ।।

ଶୋଇଗଲା କୁନି ପକାଇ ଶେଯ

ଯାତରା ଯିବାକୁ ହୋଇଲା ସଜ

ସପନରେ ହସି

ଦୋଳିରେ ସେ ବସି

ବାପା ବୋଉ ସାଥେ କଲା ମଉଜ ।।