ଯାଦୁ

ଯାଦୁ କରିବାରୁ ନାମ ଯାଦୁକର

ଯାଦୁରେ ସେ ଧୁରନ୍ଧର,

ଯାଦୁବଳେ ସିଏ ମନ କିଣି ନିଏ

ଦର୍ଶକ ହୁଏ ବିଭୋର l

ପଢ଼ିଅଛୁ ଆମେ ପୁରାଣ ପୃଷ୍ଠାରୁ

କେତେ ଯାଦୁକର କଥା,

କାହାଣୀ ଶୁଣିଲେ ଯାଦୁ ନଗରୀର

ଘୁରିଯାଏ ଆମ ମଥା l

ଯାଦୁରେ ନଅର ଜଳ ମଧ୍ୟେ ସୃଷ୍ଟି

କେତେ ପର୍ବତ ଉପରେ,

କେଉଁ ଯାଦୁକର ଆକାଶର ଶୂନ୍ୟେ

ମନ୍ଦିର ନିର୍ମାଣ କରେ l

କାଉଁରୀ କାଠିର ପରଶରେ ଯାଦୁ

ଅସାଧ୍ୟ କରେ ସାଧନ,

ମଣିଷକୁ ପଶୁ ପଶୁକୁ ମଣିଷ

ପାଗେ ହିଁ ପରିବର୍ତ୍ତନ l

ଚକ୍ଷୁବନ୍ଧନେ ସେ ଇନ୍ଦ୍ରଜାଲ ବୁଣେ

ରହି ଦର୍ଶକ ପାଶର,

ମୋହିନିଏ ମନ ଭେଳିକି ଲଗାଇ

ଯାଦୁ ହିଁ ଆଶ୍ଚର୍ଯ୍ୟକର l

କୃଷ୍ଣଚନ୍ଦ୍ର ପରା ମହା ଯାଦୁକର

ଲୁଚାଇଲେ ଦିନକର,

ରାଧା ପ୍ରେମ ପାଇଁ ଭୁତ ହେଲେ ପ୍ରଭୁ

ପୁଣି ନାବିକ ନାବର l

ପିସି ସରକାର ମହା ଯାଦୁକର

ଯାଦୁ ଦେଶବିଦେଶର,

ଯାଦୁ ବିଦ୍ୟା ବଳେ ପିଏଲ ସୁନ୍ଦରକା

ମୋହେ ଜନମାନସରେ l

ଦେବତା ରାକ୍ଷସ ଯାଦୁମାୟା ବଳେ

ଦେଖାନ୍ତି ପରାକ୍ରମର,

ନର ପାଇଁ ସାଜେ ଆଜି ସମାଜରେ

ଯାଦୁ ଶିକ୍ଷା ଭୟଙ୍କର l

ମିଛ ମାୟା ଛଳେ ଯାଦୁ ଭରପୁର

କପଟରେ ସୌଦାଗର,

ଏ ଯାଦୁର ପାଶେ ନ ରଖି ମନକୁ

ଜପ କୃଷ୍ଣ ଯାଦୁକର l