ଉଠରେ ସନ୍ତାନ ହୁଅ ସଚେତନ
ଉଠରେ ସନ୍ତାନ ହୁଅ ସଚେତନ


ଉଠରେ ସନ୍ତାନ ହୁଅ ସଚେତନ
ଶୁଅନାହିଁ ଆଳସ୍ୟରେ ।
ସ୍ୱାଧୀନ ହୋଇବି କାନ୍ଦୁଛି ତୋ ମାଆ
ଲୁହପୋଛେ ପଣତ ରେ ।
ବୀରର ସନ୍ତାନ ହୋଇ ତୁହି ଧନ
କାପୁରୁଷ ହୁଅନାହିଁ ।
ମାତୃଜାତି ଅଶ୍ରୁ ପୋଛିଦବୁ ଧନ
ସଭିଙ୍କୁ ସୁରକ୍ଷା ଦେଇ ।
କେତେ ମାଆ ବାପା ବୃଦ୍ଧାଶ୍ରମେ ପଡି
ଖୋଜନ୍ତି ତୋର ଆଶ୍ରୟ ।
କେତେ ଭଗ୍ନୀ ଆଜି ଯୌତୁକ ଜୁଇରେ
ଜଳିଯାଏ ଅହରହ ।
କେତେ ଶିଶୁ ଖଟେ ଗୋତି ଶ୍ରମିକରେ
ଅନାଥ ଆଶ୍ରମେ ବଢେ ।
ତାଙ୍କରି ସୁରକ୍ଷା ପାଇଁ ତୁହି ଧନ
ଜୀବନ ମୁରୁଛା ଲଢେ ।
ତେବେ ଯାଇ ଧନ ମାଆର ସମ୍ମାନ
ହେବରେ ନିଶ୍ଚୟ ରକ୍ଷା ।
ପୋଛିବୁ ଲୁହ ତୁ ଭାରତ ମାତାର
ଏତିକି ମାଆର ଭିକ୍ଷା ।
ତୋ ପୂର୍ବ ପୁରୁଷ ଜିତିଥିଲେ ଧନ
କାଶ୍ମିରଠୁ କୁମାରୀକା ।
ତାଙ୍କରି ଔରଷେ ଜାତ ହୋଇ ତୁହି
କରିବୁ ଦେଶ ସୁରକ୍ଷା ।
କେତେ ବୀର ରଥି ପ୍ରାଣବଳୀ ଦେଲେ
ଭାରତ ଜନନୀ ପାଇଁ ।
ଗାନ୍ଧି ଗୋପବନ୍ଧୁ ଦେଲେ ପ୍ରାଣ ବିନ୍ଦୁ
ରକତରେ ଦେଲେ ଧୋଇ ।
ଦେଉଛି ଆଶିଷ ହୁଅ ସୁମଣିଷ
ଜନନୀ ଜନମ ଭୂମି ।
ଜୀବନକୁ ତୋର ଉତ୍ସର୍ଗିତ କର
ମାଟି ମା'ର ସେବା ପାଇଁ ।