ଉତ୍ପତ୍ତି ଓ ବିଲୟ ତ ନିଶ୍ଚିତ

ଶକ୍ତି, ଶୂନ୍ୟ, ବାୟୁ, ଅଗ୍ନି, ସୂର୍ଯ୍ୟ, ଚନ୍ଦ୍ର, 

ସାଗର, ନଦୀ ଓ ଝରଣା 

ବୃକ୍ଷ, ଲତା, ପକ୍ଷୀ, ପଶୁ, ନର ନାରୀ 

ଯାହା ଅଛି ଆମର ଧାରଣା |୧|

ନାନାବିଧ ଜାତି ପ୍ରଜାତି ପ୍ରକୃତି ଆଲୋକ 

ଓ ଅନ୍ଧକାରର ସ୍ୱରୂପ

ଅଜନ୍ମା ଅଯୋନି ସମ୍ଭୂତ ଅନାଦି ଅନନ୍ତ 

ମୁରାରୀ ବା ବିଶ୍ଵରୂପ |୨|

କ୍ରୋଧ, ଲୋଭ, ମୋହ, କାମନା ଓ ବାସନା 

ସୃଷ୍ଟି କରେ ଅହଙ୍କାର

ସତ ଲାଗେ ମିଛ, ମିଛ ଲାଗେ ସତ, ରହସ୍ୟ

ବହୁଳ ଅଟେ ତ ସଂସାର |୩|

ଚିର କାଳ ଶାଶ୍ୱତ ଭାସ୍ୱର ନୁହେଁ, ସବୁର 

ଅଛି ଉତ୍ପତ୍ତି ଓ ବିଲୟ

କାହିଁକି ଛାଡିବା ସତ୍ୟ ଶାନ୍ତି ଦୟା କ୍ଷମା 

ଶ୍ରଦ୍ଧା, କାହାକୁ କରି ଭୟ |୪|

ଆପଣା କର୍ମ ସୁଚାରୁ ହେଲେ ନରହିବ 

ମନରେ କିଛି ବ୍ୟଥା

ଜଗତର ପ୍ରତ୍ୟେକ ଜନ ସୁଖରେ ବଞ୍ଚନ୍ତୁ 

ଚାଲି ଧର୍ମର ରାସ୍ତା |୫|

ଧନ ସମ୍ପତ୍ତି ନିମିତ୍ତ ମାତ୍ର, କର୍ମ କର୍ତ୍ତବ୍ୟ

ରେ ସମସ୍ତେ ହେଲେ ନିଯୁକ୍ତ 

ଗର୍ବରେ ଧନବଳରେ ମତ୍ତ ପାଗଳ ନହୋଇ

କର୍ମକୁ କର ଜୀବନର ବ୍ରତ |୬|

ନହୋଇ ଅଙ୍କା ବଙ୍କା, ପ୍ରୀତିର ଭାବ ମଣିଷ

ହୃଦୟରେ ବାଢ଼ିଦେଲେ

ଅମୃତର ବେଳା ଦେଖିବା, ଆନନ୍ଦ ଉଲ୍ଲାସରେ

ସମସ୍ତଂକ ସମୟ ବିତିଲେ |୭|

କହିପାର ଏହି କଥାଶିଳ୍ପୀର ନିର୍ମାଣ କୌଶଳ,

ପରିକଳ୍ପନା, ନାହିଁ ବାସ୍ତବିକତା

ଧ୍ୱଂସର ପୂଜାରୀ ମନେରଖ ପାଉଁଶ ତଳର ନିଆଁ 

ଦହନ କରିବ ଦିନେ ତୁମ ବିବେକ ଓ ମଥା |୮|