ଉତ୍କଳେ ମା' ବହୁରୂପା

ଉତ୍କଳ ଭୁବନେ ବିରାଜିତ ଦେବୀ କଟକେ କଟକ ଚଣ୍ଡୀ,

ଭୁବନେଶ୍ୱରରେ ଗଉରୀ ନାମରେ କୋଣାର୍କରେ ରାମଚଣ୍ଡୀ |

କାକଟପୁରରେ ମଙ୍ଗଳା ବୈଷ୍ଣବୀ ଝଙ୍କଡ଼ଠାରେ ଶାରଳା,

ସମ୍ବଲପୁରରେ ସମଲେଶ୍ଵରୀ ମା' ଶ୍ରୀକ୍ଷେତ୍ରେ ମାତା ବିମଳା |

ଯାଜପୁରଠାରେ ବିରଜାଈ ନାମ ଭଦ୍ରକରେ ଭଦ୍ରକାଳୀ,

ପାଟଣାଗଡ଼ରେ ପାଟଣେଶ୍ଵରୀ ମା' ହିନ୍ଦୋଳେ ରତନେଶ୍ଵରୀ |

ବାଣପୁରଠାରେ ମାଆ ଭଗବତୀ ଖୋରଧାରେ ବରୁଣେଈ,

ଭୂଷଣ୍ଡପୁରରେ ଉଗ୍ରତାରା ମାତା ବାଙ୍କୀରେ ମା' ଚର୍ଚ୍ଚିକାଈ |

ଖିଚିଂ ମାଟିରେ କିଚକେଶ୍ୱରୀ ମା' ଚିଲିକାରେ କାଳୀଜାଈ,

ଘଟଗାଁ'ଠାରେ ତାରିଣୀ ନାମରେ ତାଳଚେରେ ହିଙ୍ଗୁଳାଈ |

ଆଠଗଡ଼ଠାରେ ଦକ୍ଷିଣଚଣ୍ଡୀ ମା' ଖଲିକୋଟେ ନାରାୟଣୀ,

ବଡ଼ାମ୍ବାଗଡ଼ରେ ଭଟ୍ଟାରିକା ମାତା ଦକ୍ଷିଣେ ତାରାତାରିଣୀ |

ବ୍ରହ୍ମଗିରିଠାରେ ବାଲି ହରଚଣ୍ଡୀ ବାରିପଦାରେ ଅମ୍ବିକା,

ଭବାନୀ ପାଟଣା ମାଣିକେଶ୍ଵରୀ ମା' ଖଣ୍ଡଗିରିରେ କାଳିକା |

ନରସିଂହପୁରେ ନାଆଁଟି ପ୍ରଗଳା କନିକାରେ ଧାମରେଈ,

ମଝିଘରିଆଣି ରାୟଗଡ଼ାଠାରେ ଚିକିଟିଠାରେ ବରାହୀ |

ନବରଙ୍ଗପୁର ସହର ମଝିରେ ଅଛନ୍ତି ଭଣ୍ଡାର ଘରଣୀ,

ଉମରକୋଟରେ ଇଷ୍ଟଦେବୀ ମାଆ ବସିଛନ୍ତି ପେଣ୍ଡରାଣୀ |

ଢେଙ୍କାନାଳଠାରେ ବ୍ରାହ୍ମଣୀ ଦେବୀ ମା' ଜାଗାନେଇ ନାମଭିନ୍ନ,

ଗ୍ରାମରେ ସହରେ ବଜାରେ ବଣରେ ସାହା ଏକା ମାଆ ନାମ |