ଉତ୍କଳ ଦିବସ

କେତେ ଲୁହ ରକ୍ତ ମାଂସରେ ଭିଜିଛି

ଏ ପୁଣ୍ୟ ଉତ୍କଳ ମାଟି

ବରଷକୁ ଥରେ ଏକ ହୋଇ ଆସ

ପାଳିବା ସ୍ମୃତିର ଭେଟି। {୧}

ଅତୀତ କାଳରେ ଗୋରା ସରକାର

ଦେଇଥିଲା ଯେ ଯାତନା

ତଥାପି ମୋ ଭାଷା ସବୁ ଭାଷେ ଶ୍ରେଷ୍ଠ

ନମାନି ତା'ର ଯନ୍ତ୍ରଣା। {୨}

ସମୃଦ୍ଧ ସଂସ୍କୃତି ସୁଶୀଳର ଭାଷା

ମହାନ ମୋର ପ୍ରଦେଶ

ଲେଖେ ଚିରଗାଥା ପରମ୍ପରା ତା'ର

କୋଣାର୍କ କୀର୍ତ୍ତିର ବେଶ। {୩}

ସୌନ୍ଦର୍ଯ୍ୟ ଭୁଷଣୀ ମନ୍ଦିର ମାଳିନୀ

ପୁରୀ ଓ ଭୁବନେଶ୍ବର

ପର୍ବର ଆସର ପ୍ରତି ବରଷରେ

ଆଣେ ଭାବ ଭାତୃତ୍ୱର। {୪}

ଶୁଦ୍ଧ ଓଡିଆରେ ସର୍ବତ୍ର ପ୍ରଚାର

କୁଣ୍ଠା କର କାହିଁ ମନ

ଉତ୍କଳୀୟ ବୋଲି କହିଲେ କି ଲାଭ

ଆଜିକ ଗୋଟିଏ ଦିନ। {୫}