ଉତ୍କଳ ବାସୀ

ଉତ୍କଳ ବାସୀ (କବିତା)✍️🌹

ନିଦ୍ରା ପରିହାର ଉତ୍କଳ ଜାତି 

ବିଳାସ ବ୍ୟସନେ ଯାଇଛ ମାତି 

ପ୍ରସୁପ୍ତ ହୋଇଣ ବିତାଅ କାଳ 

ବିଲୁପ୍ତ ହୋଇଲା ପ୍ରାଚୀନ ବେଳ । 

ସ୍ବର୍ଣ୍ଣାକ୍ଷରେ ଲେଖା କଳିଙ୍ଗ ଗାଥା 

ଅବିସ୍ମରଣୀୟ ତାହାର କଥା 

ପୂର୍ବଜ ତୋହର ସଂଗ୍ରାମୀ ବୀର

ଅସ୍ତ୍ର ଯେ ତାଙ୍କର ଅହିଂସା ତୀର ।

କରିଲେ ଉତ୍ସର୍ଗ ନିଜର ପ୍ରାଣ

ସେହି ଏକା ଖାଣ୍ଟି ଓଡ଼ିଆ ଜାଣ  

ଉତ୍କଳ ଜାତିର ରଖିଲେ ମାନ 

ନିଷ୍ଫଳ ହୋଇନି ସେ ବଳିଦାନ । 

ତାଙ୍କରି ଦାୟାଦ ଅଟୁରେ ତୁହି

ଭୀରୁତାପଣରେ ରହିଛୁ ଚାହିଁ 

ନାରୀଙ୍କ ମର୍ଯ୍ୟାଦା ହୁଅଇ କ୍ଷୟ

ମନେ କିମ୍ପା ଏତେ କରୁଛୁ ଭୟ । 

ବିବେକ ବିଚାର ଦେଇଛୁ ମାରି 

ଜୀବନ ଯୁଦ୍ଧରେ ଯାଇଛୁ ହାରି

ଜାଗ୍ରତ ହୁଅରେ ଉତ୍କଳ ବାସୀ 

ମାତୃଭୂମି ମୋର ଉଠୁରେ ହସି ।

           ମୁକ୍ତିରାଣୀ ଦେବତା

          ମନ୍ଦାରଖଣ୍ଡ, ଯାଜପୁର