ଉପହାର

       

ବନ୍ଧୁ ତୁମେ ମୋତେ ଉପହାର ଦେଲ 

      ସ୍ନେହ ଦେଇଛ ଅଜାଡି

ଗ୍ରହଣ କରିଛି ସବୁ ଉପହାର 

       ଶୁଭେଚ୍ଛା ଦେଉଛି ବାଢି l

ନେଇଅଛି ହେଲେ ଦେଇ ମୁଁ ପାରୁନି 

       ବଦଳରେ ଉପହାର

ସୁଦାମା ପରି ମୁଁ ନିସ୍ଵ ହେ ବନ୍ଧୁ 

       ମମତା ହୃଦରେ ମୋର l

ସ୍ନେହ ଦେଉଅଛି ମମତା ଦେଉଛି 

       ପ୍ରୀତି ଦିଏ ଉପହାର

ଭାବିବନି କିଛି ଆପଣାର ଭାବି 

      ସାଦରେ ଗ୍ରହଣ କର l

ପାଇବାରେ ନାହିଁ ଆନନ୍ଦ ହେ ବନ୍ଧୁ 

       ତ୍ୟାଗରେ ହିଁ ବଢେ ସ୍ନେହ

ପାଇଗଲେ ଥରେ ଆକର୍ଷଣ କମେ 

      ନଥାଏ ଆଉ ସେ ମୋହ l

ନିଜର ଭାବିବ ହୃଦରେ ରଖିବ 

      କର୍ଣ୍ଣ ପରି ବନ୍ଧୁ ହେବ

ଜିତିବାର ନାହିଁ ଜୀବନ ଯୁଦ୍ଧରେ 

      ଜାଣିବି ବନ୍ଧୁତ୍ୱ ଥିବ l