ଉଜୁଡା ମନର ଗୀତ

ସକାଳ ସଞ୍ଜରେ କରୁଛି ପ୍ରାର୍ଥନା

ଦୟାର ଈଶ୍ୱର ଶୁଣେନି ବେଦନା

ଉଜୁଡା ମନରେ ଅନେକ ଭାବନା

ପ୍ରକାଶେ କବିତା ପାଇଁକି ସାନ୍ତ୍ୱନା l

ମନର ମୟୂରୀ ସୁନ୍ଦର ତରୁଣୀ

ଆସିଲା ସମ୍ପର୍କେ କୋମଳ ନୟନୀ

ମନକୁ ମୋହିଲା ମଧୁର ଭାଷିନୀ 

ନିଦ୍ରାକୁ ଭାଙ୍ଗିଲା ସାରସ ଗମନୀ l

ଶୟନେ ସପନେ ପ୍ରତ୍ୟେକ ସମୟେ 

ବିଦାରି ପ୍ରବେଶେ ମୋହରି ହୃଦୟେ 

ଅତୀବ ନିଜର ଲାଗଇ ସୁନ୍ଦର

ଦର୍ଶନେ ତାହାକୁ ହୁଅଇ ଆତୁର l

ପ୍ରେମର ଫାଶରେ ଅତୁଟ ବନ୍ଧନେ

ସ୍ମୃତିର ସ୍ମାରକୀ ନିଇତି ବହନେ

ଜୀବନ ଯନ୍ତ୍ରଣା କଥାଯେ ସତ୍ୟର

ବିରହ ଆବେଗ ଅପେକ୍ଷା କଷ୍ଟର l

ଅଦିନ ଝଡ଼ରେ ହଜିଲା ସପନ 

ଭାଙ୍ଗିଲା ସମ୍ପର୍କ ଉଜୁଡେ ଜୀବନ

ହେଲାସେ କାହାର ବଞ୍ଚାଇ ଇଜ୍ଜତ

ତମସା ଘେରରେ କଟିଲା ଅତୀତ ।

ଏବେବି ଝୁରୁଛି ସାଉଁଟେ ସ୍ମୃତିକୁ

ଭାବନା ଆସୁଛି ଗାଇକି ଗୀତକୁ

ଉଜୁଡା ମନରେ ସାହସ ଭରୁଛି  

ଜିଇଁବା ପାଇଁକି ପ୍ରେରଣା ଦେଉଛି l