Library
UFO(ଅଜଣା ଉଡନ୍ତା ବସ୍ତୁ)
UFO(ଅଜଣା ଉଡନ୍ତା ବସ୍ତୁ)
କିଏ ତୁମେ ବନ୍ଧୁ ଅଜଣା ଅତିଥି
କେଉଁଠାରେ ତୁମ ଘର
କି ସୁନ୍ଦର ତୁମ ବ୍ୟୋମଯାନ ସତେ
ଲାଖିଯାଏ ମନ ମୋର |
କିଏ କହେ ତାକୁ ଉଡନ୍ତା ଥାଳିଆ
କାହୁଁ ଆସି କାହିଁ ଯାଏ
ଖୋଜିଖୋଜି ତାର ଦିନ ସରିଯାଏ
ଚିହ୍ନ ପାଏ ନାହିଁ ସିଏ |
ଆଟଲାଣ୍ଟିକରେ ଯୁକ୍ତରାଷ୍ଟ୍ର ସେନା
ଖୋଜି ନୟାନ୍ତ ହୋଇବା
କାହାଣୀ ଶୁଣି ମୁଁ ହତବାକ୍ ହୁଏ
ସଭିଏଁ ହୁଅନ୍ତି କାବା |
ଉନ୍ନତ ନିଶ୍ଚିତ ତୁମ ବୈଷୟିକ
ଜ୍ଞାନ ଆମ ଠାରୁ ବେଶି
ଆଶ୍ଚର୍ଯ୍ୟ ଚକିତ କରି ଦେଉଅଛ
କେଉଁ ଦୁନିଆଁରୁ ଆସି |
କିଏ କହେ ତୁମ୍ଭେ ଏଲିଏନ୍ ବୋଲି
ଅଜଣା ଗ୍ରହର ପ୍ରାଣୀ
ପୃଥିବୀର ଲୋକ ତୁମ ପରିଚୟ
ମୋଟେ ପାରୁନାହିଁ ଜାଣି |
ତୁମର ଠିକଣା କହିଦିଅ ମୋତେ
ମୋର ବନ୍ଧୁଟିଏ ହୋଇ
ତୁମ ଖାଦ୍ୟପେୟ ବିଷୟ ଜଣାଅ
କରିଦବି ମୁଁ ରୋଷେଇ |
ତୁମ ଗ୍ରହ ନିଶ୍ଚେ ପୃଥିବୀର ପରି
ଏତେ ପ୍ରଦୂଷିତ ନୁହେଁ
ଶାନ୍ତି ମୈତ୍ରୀ ପ୍ରୀତି ସ୍ନେହ ମମତାର
ବରଷା ବରଷୁଥାଏ |
ପୃଥିବୀରେ ଆଜି ମଣିଷ ମନରେ
ଭରପୁର ଅଛି ବିଷ
ସ୍ୱାର୍ଥ ପାଇଁ ସବୁ କିଛି କରିପାରେ
ଏ ସ୍ୱାର୍ଥପର ମଣିଷ |
ତୁମରି ଯାନରେ ନେଇ ଯାଅ ମୋତେ
ତୁମ ଅଜଣା ଗ୍ରହକୁ
ପ୍ରଦୂଷଣମୟ ପୃଥିବୀରେ ମୋର
ଇଚ୍ଛା ନାହିଁ ରହିବାକୁ |
ରୋଗ ବ୍ୟାଧିମୟ ହେଲାଣି ପୃଥିବୀ
ବଞ୍ଚିବାଟା ଦୁର୍ବିସହ
ତୁମରି ଗ୍ରହକୁ ନେଇଯାଅ ବନ୍ଧୁ
ୟୁ.ଏଫ୍.ଓ.ରେ ନେଇଯାଅ |
ତୁମ ସାଥେ ସୁଖେ କାଟି ଦେବି ମୁଁହିଁ
ମୋହର ବାକି ଜୀବନ
ଛନ୍ଦ କପଟର ପୃଥିବୀରେ ଆଉ
ରହିବାକୁ ନାହିଁ ମନ |
