ଉଡୁଛି ପଇସା
ଉଡୁଛି ପଇସା
ଉଡୁଛି ପଇସା ହାଟରେ ବାଟରେ
ଧରିପାରିଲେ ତୁ ହେଲା
ସତ୍ ଉପାୟରେ ଯେତେ କମେଇଲେ
ନିଅଣ୍ଟ ସଂସାରେ ପାଲା ।
ଅସତ୍ ଉପାୟ ଭାରି ସୁଆଦିଆ
ଶୀଘ୍ର ମୁହେଁ ଲାଗେ ଘିଅ
ପାଲଟଇ ସିଏ ରକ୍ତମୁଖା ବାଘ
ଅନୀତିର ଛୁଟେ ସୁଅ ।
ଧନ ପାଲଟିଛି ସଭିଙ୍କ ପାଖରେ
ଜୀବନର ମାନଦଣ୍ଡ
ଧର୍ମ ଅଧର୍ମକୁ ଖାତିର ନ କରି
ବିକି ଦେଲାଣି ସେ ମୁଣ୍ଡ ।
ଅଳପ ରାତିକୁ ବହୁତ ସପନ
ଧାଏଁ ରାତିକେ ହାତୀଏ ପାଇଁ
ଦେଖା ଦେଖି ହୋଇ ଅଭାବିଙ୍କ ମନ
ହେଉଥାଏ ହାଇଁ ପାଇଁ ।
ଚପରାସୀଠାରୁ ତନ୍ତ୍ରୀ ମନ୍ତ୍ରୀ ଯନ୍ତ୍ରୀ
ସଭିଏଁ ଭୋକିଲା ସାଇଁ
ଶାସନ ବଳେ ଗଣତନ୍ତ୍ରର ବ୍ୟାପାରୀ
ଟଙ୍କା ଚାଷ କରୁଥାଇ ।
ଭୋଟ ବେଳେ ବହୁଗୁଣରେ ଫଳଇ
ରାଜନୀତି ସାର ପାଇ
ନୋଟ ଉଡ଼ଇ ଭୋଟ ଅମଳ ପାଇଁ
ଜନତା ବଳି ପଡ଼ଇ ।
ପେଟ ପୋଷ ନାହିଁ ଦୋଷ ଡାକରାଟି
କିଏ ଦେଇଥିଲା ସହି ?
ବିକଳ ପେଟକୁ ଦାନା ସଦା ନାହିଁ
ନୀତି ନିୟମରେ ରହି ।
ଲାଞ୍ଚ ମିଛ ଠକ ଚୋରି କାରସାଦି
ପାରଙ୍ଗମ ହେଲେ ଯାଇ
କୋର୍ଟ କଚେରୀ ଭୟ ରହେ ନାହିଁ
ଉପରୁ ଅଭୟ ପାଇ ।
କୋଠାବାଡ଼ି ଟଙ୍କାପଇସା ଘୋଡ଼ାଗାଡ଼ି
ନ ପାରିଲା କରି ରୁଣ୍ଡ
ନୀତିର ନିକିତି ଧରିକି ଭାବଇ
ଜୀବନଟା ହେଲା ପଣ୍ଡ ।
ଖଟୁଥା ରେ ପୁଅ ବାପ ଅଜା କାଳୁ
ବାଃ ବାଃ ରେ ସତିଆ ଭାଇ
ମହାଲକ୍ଷ୍ମୀ ପୂଜା ଯେତେ ତୁ କରିଲେ
ତୋଷ ନୁହେଁ ମହାମାୟୀ ।
କଷ୍ଟ କଲେ କୃଷ୍ଣ ମିଳେ କାହା ପାଇଁ ?
ମନେ ସନ୍ଦେହ ଆସଇ
ଅଧର୍ମ ବିତ୍ତ ଯାଏ ମୂଳ ସହିତ
ମନକୁ ଦିଏ ବୁଝାଇ ।
ଉଡ଼ନ୍ତା ଧନ ତ ଉଡ଼ି ଉଡ଼ି ଯିବ
ଦଉଡ଼ ଲଗାନା ଭାଇ
ନୋଟବିଡ଼ା ପାଇଁ ଧାଇଁଛନ୍ତି ଯିଏ
ପାଦ ଖସିଲେ ଉଠିବେ ନାଇଁ ।