ଉଡ଼ନ୍ତା ଥାଳିଆ

    

ଶ୍ରେଣୀରେ ଶିକ୍ଷକ କହୁଥିଲେ ଆଜି

                   ପୃଥିବୀଟା ଏକ ଗ୍ରହ

ଅନ୍ୟ ଗ୍ରହ ପରି ସୂର୍ଯ୍ୟ ଚାରିପାଖେ

                    ଘୁରୁଛି କିପରି କହ ?

ସୌରଜଗତରେ ପୃଥିବୀ ବକ୍ଷରେ

                  ଜୀବଜଗତ ଯେ ଅଛି

ଅନ୍ୟ ଗ୍ରହେ ତାହା ଅଛି କିବା ନାହିଁ

                ସେ କଥା ଖୋଜା ଚାଲିଛି ।

ବିଶ୍ୱବ୍ରହ୍ମାଣ୍ଡର ଏମିତି ଅନେକ

                  ଅଦ୍ଭୁତ କଥାକୁ ଜାଣି

କୁନି ବଡ଼ ହେଲେ ବୈଜ୍ଞାନିକ ହେବ

                ଭାବେ ମନେ ମନେ ଶୁଣି ।

ମାମୁଁ ଆଣିଦେଲେ ‘ବିଜ୍ଞାନ ଜଗତ’

                  ପତ୍ରିକା କୁନି ନିମନ୍ତେ

ଅତି ଆଗ୍ରହରେ ପଢ଼ିଗଲା ସେ ତ 

                ଖୁସି ହେଲା ପଢ଼ା ଅନ୍ତେ ।

ନୂଆ କଥାଟିଏ ମନକୁ ଘାରିଲା

                 ପତ୍ରିକା ଦେଲା ବତାଇ

‘ଉଡ଼ନ୍ତା ଥାଳିଆ’ ନାମଟି ତାହାର

                କ୍ଷଣକେ ଅଦୃଶ୍ୟ ହୋଇ ।

ଅନ୍ୟ ଗ୍ରହ ଜୀବ ସିନେମାରେ ସିଏ

                 ଦେଖିଥଲା ଯେଉଁ ପରି

ମନେପଡ଼ିଗଲା ତା’ର ସେଇ କଥା

                 ଅଛି କେ ଜୀବ ସେପରି !

ଭାବି ଭାବି ଶୋଇପଡ଼ିଲା ନିଦରେ

                 ଦେଖିଲା ଅଦ୍ଭୁତ ଜୀବ

ଉଡ଼ନ୍ତା ଥାଳିରୁ ଆଲୋକ ପକାଇ

                 ନେଇଯାଏ ତଳ ଦ୍ରବ୍ୟ ।

ଦେଖିବାକୁ ତାହା କବାଟ ଫିଟାଇ

                ବାରିପଟେ ହେଲା ଉଭା

ସେ ଆଲୋକ ଭିତରେ ବଉଳା ବୋବାଳି

                ଶୁଣି କାନ ତା’ର ଭାଁ ଭାଁ ।

ଚିତ୍କାର କରି କାନ୍ଦେ ଉଚ୍ଚ ସ୍ୱରେ

                 ବଉଳା ଯିବ ତା’ ଚାଲି

ମାଆ ମାଆ ବୋଲି ଡାକଦିଏ ସିଏ

                 ଭୟରେ ପାରୁନି ହଲି ।

ଏତିକି ବେଳକୁ ମାଆ ଡାକ ଶୁଣି

                 ନିଦ ଭାଙ୍ଗିଗଲା ତା’ର

ସପନ କାହାଣୀ ମାଆକୁ ବଖାଣି

             .   ଗୁହାଳେ ହେଲା ହାଜର ।

ବଉଳା କୋଳରେ ବାଛୁରି ଶୋଇଛି

                ଦେଖି ହୋଇଗଲା ଖୁସି

ପାଖେ ଯାଇ ତା’ର ଆଉଁସି ଆଉଁସି

                ଫେରିଲା ସେ ହସି ହସି ।

ସପନ କଥାରେ ମନେ ମନେ ଭାବେ

                 ଦିନେ ବଡ଼ ମୁହିଁ ହେଵି

ବିଜ୍ଞାନମୁଣିରୁ ଏହାର ସତ୍ୟତା

                 ଖୋଜି ବାହର କରିବି ।