ଉଦାରତା ଜହ୍ନ ଉଏଁ

ଉଦାର ହୃଦୟ  ସୁଶୀତଳ ଉତ୍ସ

  କୋମଳ ଜଳ ସଦୃଶ

ହରେ ଦୁଃଖକଷ୍ଟ ତୃଷାର୍ତ୍ତ ପରାଣେ

  ଭରେ ଆନନ୍ଦ ସନ୍ତୋଷ ।

ଉଦାର ସ୍ୱଭାବ  ସୁମହତ ଗୁଣ

  ଦାନ ଧର୍ମ ଦୟାକ୍ଷମା

ଉଜ୍ଜ୍ୱଳ ଆକାଶ ଉଦାର ହୃଦୟ

  ଅମୃତ ଭାବ ସୁଷମା ।

ଉଦାର ବ୍ୟକ୍ତିତ୍ୱ  ସମର୍ଥ ସାର୍ଥକ

   ଫଳଛାୟା ସମନ୍ୱିତ

କରେ ପରିପୂର୍ଣ୍ଣ  ଆଶ୍ରୟ ପ୍ରଦାନ

   ସ୍ଥିତପ୍ରଜ୍ଞ କଳ୍ପବୃକ୍ଷ ।

ଭାବେ ନାହିଁ ସିଏ  ପର ଆପଣାର

   ହୁଅଇ ସାହା ଭରସା

ବସୁଧାକୁ ମଣେ  କୁଟୁମ୍ବ ନିଜର

  ଜୀବନେ ସଞ୍ଚରେ ଆଶା ।

ଅନାହତ ଚକ୍ରେ  ଉଦାର ସ୍ୱଭାବ

   ସୁବିମଳ ବିମ୍ବ ପ୍ରାୟେ

ଢାଳଇ ଜୋଛନା କଲ୍ୟାଣ କାରଣେ

   ଉଦାରତା ଜହ୍ନ ଉଏଁ ।