ତୁଣ୍ଡରେ ଥାଉ ଜଗନ୍ନାଥ ନାମ
ତୁଣ୍ଡରେ ଥାଉ ଜଗନ୍ନାଥ ନାମ


ତୁଣ୍ଡରେ ଥାଉ ମୋ ଜଗନ୍ନାଥ ନାମ
ମନେ ଉଠୁ ଥାଉ ଭାବ ଲହରୀ
ପଞ୍ଚା ମହାଭୂତୁ ଆସିଛି ପ୍ରଭୁ ହେ
ନାମ ତୁଣ୍ଡେ ନେଇ ଯିବି ବାହାରି |
ପଞ୍ଚଇନ୍ଦ୍ରିୟ ର ସଦୁପଯୋଗରେ
ତୁମ ନାମ ଦେବ ଅପୂର୍ବ ଶକ୍ତି
ଷଡ଼ରିପୁ ମୁହିଁ ଦମନ କରିବି
ମୁଖେ ଗାଇ ପ୍ରଭୁ ନାମ ଓ ସ୍ତୁତି |
ସଂସାର ସାଗରେ କରମ ଯୋଗରେ
ପଦ୍ମ ପତରର ଜଳର ସ୍ଥିତି
ଢଳ ଢଳ ହୋଇ ତୁମ ନାମ ଧରି
ଭବ ତରଙ୍ଗିଣୀ ହେବି ହେ ପାରି ।
ଜଗନ୍ନାଥ ତୁମ ନାମ କୈବଲ୍ୟରେ
ସରଜନା ହେବ ଧଇର୍ଯ୍ୟ ବନ୍ଧ
ପୂଜା ମନ୍ତ୍ର କିଛି ଜାଣି ନାହିଁ ପ୍ରଭୁ
ତୁମ ନାମ ଗାଇ ହୋଇବି ଅନ୍ଧ |
ତୁଣ୍ଡେ ତୁମ ନାମ ଗାଇ ଯାଉ ଥିବି
ହୃଦ ସିଂହାସନେ ଦେବି ବସାଇ
ରତ୍ନ ସିଂହାସନ ନଥିଲେ କି ହେଲା
ମୋ ଶ୍ରଦ୍ଧା ଗଳୀକୁ ଆସିବ ଧାଇଁ ।
ତୁମ ପାଖେ ଶଙ୍ଖ ବାଜିବାକୁ ନାହିଁ
ବେଦନା ର ଶଙ୍ଖ ଦେବି ବଜାଇ
ତୁମ ନାମ ତୁଣ୍ଡେ ଧରି ଜଗନ୍ନାଥ
ଆଖି ଲୁହେ ଦେବି ପାଦ ମୁଁ ଧୋଇ ।
ତୁମ ନାମ ଧରି ଶ୍ରଦ୍ଧା ସୁମନ ରେ
ସଜାଇ ଦେବି ହେ ବଡ ଠାକୁରେ
p>
ତୁମରି ନାମକୁ ତୁଣ୍ଡ ରେ ଧରି ମୁଁ
ନୈବେଦ୍ୟ ଦେଖିବି ଖୁଦ ଭଜାରେ |
ତୁମ ନାମ ତୁଣ୍ଡେ ଗାଇ ଗାଇ ପ୍ରଭୁ
କର୍ତ୍ତବ୍ୟ କର୍ମ ରେ ଲିପ୍ତ ରହିବି
ତୁମ ନାମ ତୁଣ୍ଡେ ଧରି ଜଗନ୍ନାଥ
ଏ ଭବ ସାଗର ପାରି ମୁଁ ହେବି |
ତୁମରି ନାମରୁ ବିଶ୍ୱାସ ପାଇବି
ନାମରୁ ପାଇବି ଭରସା ରାଶି
ତୁମ ନାମ ତୁଣ୍ଡେ ଥିଲେ ଜଗନ୍ନାଥ
ହୋଇ ଯିବି ପରା ଶ୍ରୀକ୍ଷେତ୍ର ବାସୀ ।
ସକାଳ ସୁରୂଜ ମୁରୂଜ ବୁଣିଲେ
ଗାଇ ଦେଉଥିବି ତୁମରି ନାମ
ପକ୍ଷୀ କାକଳୀରେ ସବୁଜ କଳୀରେ
ଅନୁଭବୁ ଥିବି ତୁମକୁ ଶ୍ୟାମ |
ତୁମ ନାମ ତୁଣ୍ଡେ ଗାଇ ଜଗନ୍ନାଥ
ନିଦରୁ ଉଠିବି ଖୁସୀ ମନରେ
ତୁମରି ନାମକୁ ଗଣ୍ଠିଧନ କରି
ଶୋଇଯିବି ପ୍ରଭୁ ରାତ୍ରୀ କୋଳରେ |
ତୁମରି ନାମକୁ ଆହୁଲା କରି ମୁଁ
ପାରି ହୋଇଯିବି ଏ ଭବ ବାରି
ତୁମରି ନାମର ଶାଶ୍ଵତ ସ୍ପର୍ଶରେ
ବରଷୁ ଥିବ ଯେ ଶାନ୍ତିର ବାରି ।
ଆହେ ଜଗନ୍ନାଥ ଭକତ ବାନ୍ଧବ
କରୁଅଛି ଆହେ ଏହି ବିନତି
ତୁମ ନାମ ସଦା ଏ ତୁଣ୍ଡରେ ଥାଉ
ମଣିଷ ଜୀବନ ପାଉ ସୁଗତି ।