ତୁମନାମ ତୁଣ୍ଡେ ଥାଉ

ଚିହ୍ନି ପାରିଲେନି ସହଜରେ କେହି

ପୂର୍ଣ୍ଣବ୍ରହ୍ମ ତୁମେ ଶ୍ରୀ ନାରାୟଣ

ସମସ୍ତେ କହିଲେ କୃଷ୍ଣ ବଳରାମ

ଯଶୋଦା ମା'ଙ୍କ ଦୁଇ ନୟନ I

ଅତି ସାଧାରଣ ପିଲାପରି ତୁମେ

ଖେଳିଲ ବୁଲିଲ ଦୁଷ୍ଟାମୀ କଲ

ଅନ୍ୟଘରେ ପଶି ଲବଣୀ ଖାଇଲ

ନାମ ଅରଜିଲ ଲବଣୀ ଚୋର I

ତୁମର ଦୁଷ୍ଟାମୀ ଆହେ ଅନ୍ତର୍ଯାମୀ

ଯାମଳ ଅର୍ଜୁନ ପାଇଲେ ମୁକ୍ତି

ମା' ଦେଖିଥିଲେ ତୁମ ବିଶ୍ୱରୂପ

ଦୁଷ୍ଟପଣେ ଯେବେ ଖାଇଲ ମାଟି I

ତୁମ ଦୁଷ୍ଟପଣ କି ଅବା ବର୍ଣ୍ଣିବି

ଗୋପୀ କରୁଥିଲେ ଯମୁନା ସ୍ନାନ

ଲୁଚି ଲୁଚି ତୁମେ ଗୋପନେ ଆସିଲ

ଚୋରି କରିନେଲ ପିନ୍ଧା ବସନ I

କେବେ ସାଧାରଣ ଗଉଡ ପିଲାଟେ

କେବେ ଗିରି ଗୋବର୍ଦ୍ଧନ ଧାରଣ

ରାଜା ହୋଇ ପୁଣି ବନ୍ଧୁ ସୁଦାମାର

ଧୋଇ ଦେଇଥିଲ ଦୁଇ ଚରଣ I

ତୁମେ ଲୀଳାମୟ ସବୁ ତୁମ ଲୀଳା

ଅନନ୍ତ ଅସୀମ କୃପା ସାଗର

ଏ ଭବ ସାଗରୁ ପାରିକର ମୋତେ

ସଦା ତୁଣ୍ଡେ ଥାଉ ନାମ ତୁମର I