ତୁମେ ଯେବେ ଛୁଇଁଦିଅ

ତୁମେ ଯେବେ ଛୁଇଁଦିଅ

ମୋ ବେନି ନୟନ ଛାୟାଧର

ଓଠ ଧାରେ ଖେଳିଯାଏ

କ୍ଷୀଣ ଏକ ଫୁଆରା ହସର ।

ମନ୍ଦ ମନ୍ଦ ସମୀରର

ଶ୍ରୁତି ମିଷ୍ଟ ମୃଦୁ ମହ୍ଲାରରେ

ଲୋଭନୀୟ ରଙ୍ଗେ ଭରା

କୁସୁମିତ ଲତିକା ଘେରରେ ।

ଜାତି ଜାତି ସୁଗନ୍ଧିତ

ମୋହଭରା ମହକରେ ଛାଇ

ସୂକ୍ଷ୍ମ ଶୁଭ୍ର ମେଘମାଳା

ଗଭାମଧ୍ୟେ ଯତନେ ସଜାଇ ।

ଦିଗ୍ ବଳୟୁ ସ୍ଵର୍ଣ୍ଣମୟ

ରାଶି ରାଶି ରେଣୁର ଚମକ

କମନୀୟ ଅବୟବୁ

ସତେକି ଝଟକେ ଝକମକ ।

ସ୍ଵର୍ଗୀୟ ଭାବରେ ବନ୍ଧା

ଜ୍ୟୋତିର୍ମୁଖେ ସଦା ସ୍ମିତ ହସ

ସାଗର ଭେଦି ଚକ୍ଷୁରେ

ମଦାଳସା ସ୍ଫୀତ ଅଭିଳାଷ ।

ସପନ ହେ... ତୁମ ସ୍ନେହେ

ଧନ୍ୟ ମୋର ହୃଦୟ ମାନସ

ନିତି ନିଶି ଦେଇଯାଅ

ଶୁଷ୍କ ହୃଦେ ପ୍ରିୟାର ପରଶ ।

ଟି. ଦୁର୍ଗା ପ୍ରସାଦ ରାଓ