ତୁମେ ଫେରିବକି ପୁଣି
ତୁମେ ଫେରିବକି ପୁଣି
ତୁମେ ମେଘକୁ ଘୋଡ଼ା କରି
ପାରିଜାତ ତୋଳିବାକୁ ଯିବତ ଯାଅ ।
ତୁମେ ତାରା ରାଇଜକୁ
ସ୍ୱପ୍ନ କିଣିବାକୁ ଯିବତ ଯାଅ ।
ତୁମେ ଜହ୍ନର ଆରପାରି ଗାଆଁକୁ
ଗଭା ସଜେଇବାକୁ ଯିବତ ଯାଅ ।
ଏସବୁ ତ ମୋ ପରିଧିର ବାହାରେ!
ତୁମେ ରାତିର ଖାତା ଓଲଟେଇ,
ଅବୁଝା ଶବ୍ଦଗୁଡିକୁ ପୁଣିଥରେ
ଖୋଜିବାକୁ ଚେଷ୍ଟା କରିବ ତ
ମୁଁ ଅଛି,
ଅନ୍ଧାରର ପେଟଚିରି
ତୁମକୁ ରାସ୍ତା ଦେଖେଇବାକୁ ।
ତୁମେ ମୁଣ୍ଡରେ କଇଁଫୁଲ ଖୋସି,
ପୁଣିଥରେ ପୋଖରୀ କୂଳରେ ବସି,
ପାଣିକୁ ଅସ୍ଥିର କରିବ ତ
ମୁଁ ଅଛି,
ଆଞ୍ଜୁଳାଏ କୁନି ପଥର
ତୁମ ହାତରେ ଧରେଇ ଦେବାକୁ ।
ତୁମେ ଉପାସରୁ ପେଟେ ପିଇ,
ନିଦ ସହ ସନ୍ଧିକରି, ମୋ ଛାତିରେ
ମନଭରି ଶୋଇବ ତ
ମୁଁ ଅଛି,
ତୁମ ଘନ କେଶରାଶିରେ
ଆସ୍ତେ କରି ହାତ ସାଉଁଳେଇ ଦେବାକୁ ।
ମୁଁ ଅଛି,
ତୁମ ଦୁଷ୍ଟାମି ସବୁକୁ
ଡାଏରିରେ, କବିତାର ଆଞ୍ଚଦେଇ
ଭାଡ଼ି ତଳେ ବୁଢ଼ୀଆଣିକୁ
ସଅଁପି ଦେବାକୁ ।
ମୁଁ ଅଛି ,
ତୁମ ବିଶ୍ୱାସ ସବୁକୁ
ସାଉଣ୍ଟିନେଇ, ଛିଣ୍ଡା ଗାମୁଛାଟିରେ
ପୁଟୁଳାକରି ଶେଷ ବିନ୍ଦୁ ଯାଏ
ବୋହିନେବାକୁ ।।