ଗାନ୍ଧୀଙ୍କ ତିନି ମାଙ୍କଡ଼

                   

ଧନ୍ୟ ସେ ମହାତ୍ମା       ଜଗତ କଲ୍ୟାଣେ 

      ଉତ୍ସର୍ଗିତ କଲେ ନିଜ ଜୀବନ 

ସଭ୍ୟ ସମାଜଟେ        ଗଢିବାକୁ ଦେଲେ 

      ତିନି ମାଙ୍କଡର ଉଦାହରଣ 

ମନ୍ଦ ଦେଖ ନାହିଁ        ମନ୍ଦ ଶୁଣ ନାହିଁ

      ମନ୍ଦ କୁହ ନାହିଁ କେବେବି କେହି 

ଆଜିବି ମୋ ଦେଶ       ପ୍ରଗତି କରୁଛି  

      ଏହି ତ୍ରି ଆଦର୍ଶ ସାଥିରେ ନେଇ 

ଚାମଚ ଚୋରଟା        ଦଣ୍ଡ ପାଇବାକୁ 

       ଚାଳିଶି ବରଷ ସମୟ ନିଏ

ଜଘନ୍ୟ ହତ୍ୟାର        ଦୋଷୀ ଜେଲ୍ରୁ 

       ଜୋଇଁପୁଅ ପରି ଜାମିନି ପାଏ 

ସାକ୍ଷୀ ନମିଳିଲେ       ଠକ ସାଧୁ ହୁଏ

       ସବୁ ଦେଖି ଚାହିଁ ଅନ୍ଧ ଅବସ୍ଥା 

ଆଖି ହାତଦିଆ        ମାଙ୍କଡଟା ପରା 

       ଆମ ଅଦାଲତ ନ୍ୟାୟ ବ୍ୟବସ୍ଥା 

ମାଫିଆ କହୁଛି        ଇଲାକା ମୋହର 

       ପୋଲିସ ସାଜିଛି ନିରବ ଗୁଙ୍ଗ 

ଲମ୍ପଟ ବାଂଟୁଛି        ସାଧୁ ରୂପେ ଧର୍ମ 

       ଶାନ୍ତିଦୂତ ଆଜି କଲାଣି ଦଙ୍ଗା 

ଲୁଣ୍ଠନ ଦୁଷ୍କର୍ମ          ହତ୍ୟା ରାହାଜାନୀ

       ଯେତେବା ବିପ୍ଳବ ହେଉବା ହାଲ୍ଲା 

ଦ୍ୱିତୀୟ ମାଙ୍କଡ         ଆମ ସରକାର 

       କାନ ବନ୍ଦ କରି ହୋଇଛି କାଲା 

ଶ୍ରମର ମହତ୍ତ୍ୱ         ଛେଳି ଶିଖାଉଛି  

       ଦେଖ ଶୃଙ୍ଖଳା ଶିଖାଏ ଶୃଗାଳ 

ମୂଷା ଦାୟିତ୍ୱରେ        ଦସ୍ତାବିଜ ଅଛି 

       କିବା ଦେଶର ହୋଇବ ମଙ୍ଗଳ 

ନିଜ ସ୍ୱାର୍ଥ ପାଇଁ         ଏତେ ଗଡବଡ 

       ଦେଖି ଶୁଣି ସବୁ ଚୁପ ରହୁଛୁ 

ଆମେରେ ଜନତା        ତୃତୀୟ ମାଙ୍କଡ 

       ମୁହଁ ବନ୍ଦ କରି ମୂକ ହୋଇଛୁ ।