ତୁମେ ନିର୍ଦେଶକ

ତୁମେହିଁ ଲେଖକ ତୁମେ ନିର୍ଦେଶକ

     ଏ ଜୀବନ ନାଟକରେ,

ତୁମ ଇଙ୍ଗିତରେ ଏ ନାଟକ ଚାଲେ

     ଯବନିକା ଇସାରାରେ

ପ୍ରଭୁ, ଥାଇ କାହିଁ କେଉଁ ଦୂରେ l0l

ଦଶ ମାସ ତୁମେ ସଂଳାପ ଅଭ୍ୟାସ

    କରାଇଲ ମାତୃ ଗର୍ଭେ,

କେମିତି ନାଟକ ହେବ ମନଲୋଭା

    ଶିଖାଇଲ ତୁମ ଭାବେ,

ଲୋଭ, ମୋହ, ହିଂସା, ଅନ୍ୟାୟ, ଅନୀତି

    ଦେଖଣା ହାରି ନାଟରେ, l୧l

 ମଞ୍ଚ ତ ବାନ୍ଧିଲ ସାଜସଜା କଲ

    ମଞ୍ଚକୁ ଦେଲ ପଠାଇ,

ତୁମେ ଅନ୍ତରାଳେ ସବୁ ଦେଖୁଥିଲ

    ମଞ୍ଚେ ସବୁ ଭୁଲିଯାଇ,

ଦେଖଣାହାରିଙ୍କ ପସନ୍ଦରେ ଯାଇ

    ପଡ଼ିଗଲି ମୁହିଁ ଫାନ୍ଦରେ, l୨l

ଏବେ ମନେ ପଡ ତୁମେ ମହାପ୍ରଭୁ

     ଚରଣେ ଦିଅ ଶରଣ,

ମୋର ଦୋଷ ପାଇଁ ଯାହା ତୁ ଦଣ୍ଡିବୁ

     ଦେବୁତୁ ଯେତେ କଷଣ,

ସବୁତ ସହିବି ଦୋଷ ଦେବୀ ନାହିଁ

     ପଦ ଧ୍ୟାୟୀ ନିରନ୍ତରେ, l୩l