ତୁମେ ଗଲା ପରେ

ମନର ଅଗଣା ଶୂନ୍ୟ ପଡ଼ିଅଛି

ହୃଦୟ ପଡିଛି ଖାଲି,

ତୁମେ ଗଲା ପରେ ପାଷାଣ ଶରୀର

ପାରୁନି ଆଗକୁ ଚାଲି |

ମୋ ମନରେ କେତେ ସ୍ୱପ୍ନ ସଜାଇଲ

ପୂରଣ କରିଲ ନାହିଁ,

ଅଧା ବାଟେ ମୋତେ ପର କରିଦେଲ

ନିଃସଙ୍ଗ ଯେ ଲାଗୁଥାଇ |

ଆଉ କା ଜୀବନେ ସଂଜୀବନୀ ଦେଲ

ଗଢ଼ିଲ ନୂଆ ସଂସାର,

ମୋ ଜୀବନ ପଥ ଶୂନ୍ୟ କରିଦେଲ

ବଞ୍ଚିବା ଲାଗେ ଅସାର |

ଏତେ କଥା ଯଦି ତୁମ ମନେ ଥିଲା

ସମ୍ପର୍କ ଗଢ଼ିଲ କାହିଁ,

ପୁରୁଣା ସ୍ମୃତିକୁ ଭୁଲି ପାରୁନାହିଁ

ଆଖି ଲୁହ ହୁଏ ନଈ |

ହୃଦୟକୁ ମୋର ଖେଳନା ଭାବିଲ

ଛଳନା ଭରିଲ ମନେ,

ବିଗତ ଦିନର ଅଭୁଲା ମୁହୂର୍ତ୍ତ

ମନେ ପଡୁନାହିଁ ଦିନେ |

କି ଲାଭ ପାଇଲ ମୋତେ ଦୁଃଖ ଦେଇ

ରହିବ ବୋଲି ସୁଖରେ,

ଶସ୍ତା ମନ ତୁମ ଚିହ୍ନି ନପାରିଲି

ଦିନ ରାତି ଝୁରି ମରେ |

ସଳିତା ଭଳି ମୁଁ ଜଳୁଥିବି ନିତି

ଯେତେ ଦିନ ଥିବ ପ୍ରାଣ,

ତୁମ ସ୍ମୃତି ଧାରେ ଚାଲୁଥିବି ବାଟ

ବଞ୍ଚିଥିବି ଯେତେ ଦିନ |